Удмурт йӧскалык театрлэн пичи залаз кутскись режиссёрлэн но сценаристлэн, мунё театрысь актёрлэн Сергей Антоновлэн «Пуны» пьесаезъя спектаклез возьматозы. Драма гуртын улӥсь пересь сярысь, кудӥз котькуд нунал одӥг дугдылонние нылъёссэ возьманы ветлэ. Режиссёр верамъя, та учыр юромо малпамын шуыса вераны уг луы.
«Котькуд гуртын милям сыӵе пересьёсмы вань, котькуд улосын. Соин ик сое малпаны но кулэ ӧй вал, сое бумага вылэ гинэ поттоно. Бумага вылысь табере сцена вылэ
Сергей Антонов
Валтӥсь героез, Пересез, Удмурт Элькунысь калык артист Александр Баймурзин шудэ (Сергей Пислеговен вошъяськыса). Пӧйшурасьлэсь рользэ вошъяськыса быдэсто Кадим Галиханов но Иван Плотников. Пуныез «улэп каризы» Светлана Ложкина но Светлана Сергеева. Режиссёрлэн верамезъя, пьесаын возьматэм геройёсты артистъёс сцена вылын чебергес, мургес каризы. Куд-огзэ актёръёсты Сергей Антонов ачиз бырйиз, нош куд-огзэ Йӧскалык театрын ужасьёс дэмлазы.
«Кудзэ ке но ачим бырйи, Алексей Арсентьевичлы (Ложкинлы, йӧскалык театрысь валтӥсь режиссёрлы — ред.) рос-просверай, та адями тае шудыны кулэ шуыса. Куд-огъёссэ, кин татын умойгес тодэ артистъёсты, соос пуктӥзы», — шуиз Сергей Антонов.
Пересез шудӥсь, Александр Баймурзин верамъя, со яратэ таӵе рольёсты, кытын серекъянэз но, бӧрдонэз но вань. Берло дыре удмурт учкисьёс капчигес спектакльёсты, комедиосты ярато, но улон пӧртэм-пӧртэм луэ, нунал куспын асьмелэн мар гинэ уг луы, шуэ Александр Баймурзин.
«Спектакль бӧрсьы коть одӥг адями ке но соку ик телефонзэ кутыса дораз жингыртӥз ке анай-атаезлы, ми ужмес шонер лэсьтӥм шуыса малпасько.
Александр Баймурзин, Удмуртиысь калык артист
Адямиос сяна, спектакльлэн одӥгез валтӥсь героез — со пуны. Сюрес вылын сӧсырмем пӧйшурез Пересь утялтыны кутске, нылъёсызлэсь мӧзмон мылкыдзэ солы сётэ. Сцена вылын пунылэн мунёеныз йӧскалык театрысь актриса Светлана Ложкина шудэ. Солэн верамезъя, роле мургес пырыны улонысьтыз сюлмаськонэз юрттӥз.
«Мынам таяз арын 12-тӥ этажысь коӵыше усиз. Со кызьы выриз, мон сое эмъяй, мон соин выри. Солэсь мылкыдзэ татчы пыртӥ, пунылы. Асьмелэн коӵышмы улӟиз», — шуэ элькунысь дано артистка.
Сцена вылын туж ӧжыт декорациез, ӧжыт геройёсыз, со ик спектакльлэн пуштросаз мургес выйыны, туала улонысь лулпуш ужпумъёс шоры палэнысен учкыны луонлык сётэ.
«Пуны» драмалэн премьераез 8-тӥ но 9-тӥ толсуре ортчоз. Сергей Антонов верамъя, учкисьёслы кельшиз ке, возьматонъёс азьланяз но луозы на. Йӧскалык театрлэн экспериментальной площадкаез шуыса кылдытэм пичи заллэн сцена вылаз та нырысетӥез спектакль луоз.
Ватсалом спектакльлэн пуктӥсь суредасез Ольга Глухова, крезьгурез бырйиз Антон Васильев.
Тодэ вайытом, таяз арын куартолэзе театрлэсь пичи залзэ егит артистэн Константин Ложкинэн дасям туала кылбуретэз крезьгурен но кырӟанъёсын герӟам ӝытэн усьтӥзы.
Наталья Еркешева
ИА «Удмуртия»
7.12.2017
