Государственный национальный театр Удмуртcкой Республики

  Удмурт йӧскалык театрын нырысьсэ мюзикл возьматозы 28-тӥ куарусёнэ  

28-тӥ но 29-тӥ куарусёнэ Удмурт йӧскалык театрлэн сцена вылаз нырысьсэ Александр Гринлэн «Алые паруса» повестезъя мюзикл возьматозы. Туннэ, 25-тӥ куарусёнэ, нырысетӥ учкисьёс постановкалэсь берпуметӥ репетицизэ адӟыны быгытӥзы.
«Котькуд адямилэн вань аслаз кыӵе ке но льӧль малпанэз, со адями со льӧль малпанэз сьӧры мыныны кулэ. Медам со сётӥськы секытъёслы. Вот мынам сое возьматэме потӥз та сцена вылын», — валэктэ произведение быръемзэ Удмурт йӧскалык театрлэн валтӥсь режиссёрез Алексей Ложкин.
Режиссерлэн верамезъя, мюзикл пуктыку тужгес секытэз — со актёръёслэсь быгатэмлыксэс, кырӟанъёсты но эктонъёсты огазе карыны.

«Макем шуггес, кызьы сое вормиськод — со ик тунсыкоез луэ. Шугез вормиськод ке, со озьы ик льӧль малпанлы матэктытӥсь вормон луэ»
Алексей Ложкин

«Алые паруса» мюзиклын театрлэн быдэс труппаез шудэ. Массовкаен ӵош лыдъяса, со ог 40 пала адями. Мюзикл пуктонын техникая аспӧртэмлыкъёсыз вань. Соос борды артистъёслы дышыны кулэ луиз. Кылсярысь, кырӟанъёс мед чебер кылӥськозы шуыса, актеръёс сцена вылын микрофонъёсын шудӥзы:
«Кӧня театрын ужаськом, микрофонъёс ноку но ӧй вал кадь. Котьку но малпаськоно таиз сярысь, кызьы адӟиське <…> мон туннэ куалекъяса-куалекъяса потон азям вунэтӥськем ӝуатыны (микрофонэз — ред.)», — вера Константин Никитин, Удмурт йӧскалык театрысь артист, «Алые паруса» мюзиклын Греез шудӥсь.
Постановка учкисьёслы ярамон луон понна, артистъёслы трос вылезлы дышетсконо луиз. Тулыспалысен кутскыса, соосын рос-прос вокалэн Валерий Каракулов выриз, нош степ эктыны Полина Лебедева дышетӥз.
Полина Лебедева верамъя, со Лулчеберетъя элькун колледжын калык эктонъёслы дышетэ. Нош степен со Пермьын дышетскыкуз выремын бере, актёръёсты но та амалын эктонлы дышетыны быгытӥз.

«Мон понна туннэ дасяллям кузьым. Степен берпуметӥ люкет, кытын кӧняез ке вышкы вылын, кӧняез ке пулъёс вылын (экто — ред.), малпамын вал фонограмма улэ, нош туннэ фонограммаез кысӥзы»
Полина Лебедева, Лулчеберетъя элькун колледжысь калык эктонъя дышетӥсь, «Алые паруса» мюзиклысь эктонъя дышетӥсь

Степ но кырӟанъёс дышетон сяна, костюмъёс кылдытонъя бадӟым уж лэсьтэмын. Соослэн художниксы Олег Ажгихин верамъя, дӥсьёсты малпан понна со выльысь «Алые Паруса» повестез лыдӟиз, соя лэсьтэм фильмез но постановкаосты учкиз. Мюзикл понна костюмъёс лэсьтон аспӧртэмлыко: режиссёрлэн малпанъёсыз, тыл, крезьгур, декорациос — ваньзэ сое лыдэ басьтоно.
«Мынам потэ вал, дӥськутын стилез мед адӟиськоз. Со дыре ик, кыӵе ке одӥг даурен, кыӵе ке одӥг кунэн медаз герӟаськы. Та выжыкыл дыръёс куспытӥ ортче, кыӵе ке одӥг интыен герӟаськытэк, соин ик ужаны тунсыко вал», — шуиз иворъёсъя «Удмуртия» агентстволы Олег Ажгихин.
Пусъём, мюзиклысь куд-ог рольёсты артистъёс вошъяськыса шудозы. Кылсярысь, Ассолез — Наталия Буранова яке Анастасия Шубина, Греез — Константин Никитин яке Алексей Котков, нош Маннерс младшиез — Вадим Дмитриев яке Сергей Наговицын. Куке актёръёс валтӥсь героез уз шудэ, соос массовкае пыриськозы.

Наталья Еркешева
ИА "Удмуртия"
25.09.2017