Удмуртиысь йӧскалык театр нырысьсэ мюзикл пуктыны басьтӥськиз. Александр Гринлэн «Алые паруса» кузьверосэзъя кык ёзэн возьматонлэн премьераз куарусёнэ ортчоз. Нош туннэ, 26-тӥ инвожое, журналистъёсты усьтэм репетецие ӧтизы.
Александр Гринлэн тросэзлы тодмо луись яратон но лемлет малпан сярысь кузьверосэз мюзикл жанрын чылкак выль сямен чузъяське. Дунне чутрак кыклы люкемын — сьӧд но тӧдьы, шонергес, пурысь но лемлет. Одӥгаз - сур кисьтӥське но туннэ нуналэн гинэ улон малпан кузёяське. Мукетаз — Ассольлэназ — лякыт но югыт, кыдёкысь лыктӥсь парусъёс понна оскон тыл ӝуатӥське.
Татын Ассоль — паймымонозэ возьмаса чигтӥськон калэ вуэм, лек дуннеын ассэ утьыны тыршись. Нош Грей — выжыкылысь принц ӧвӧл, со улонэз адӟем, воштӥськонъёсты возьмась зарезь капитан.

«Туала улонын тросэз янгышало — капчиезлы оско. Та пьесаез ми басьтӥмы малы? Ассосль — со уг сётскы, со аслаз льӧль малпанэз доры вань секытъёсты курадӟыса кошке но ворме. Солы юрттэ, валамон ни, Грей»
пуктӥсь режиссёр Алексей Ложкин

Вераны кулэ, спектакль ӟуч кылын пуктэмын.
«Вань сыӵе постановкаос, кудъёссэ удмурт кылын лэсьтыны уг луы. Ми малы лэсьтӥмы на тае эшшо — возьмаськомы удмурт мюзикл гожтэмзэс. Гожтӥзы ке, ми дась сое пуктыны. Татын кулэ луыны крезьгурчи, татын луыны кулэ, кылбурен ке со, кылбурчи но автор-драматург. Татын огшоры гинэ уж ӧвӧл — пластика, артистлэн ужез, ваньмыз… Со бордын туж бадӟым секытэз», — вераз режиссёр.
Мюзикл пуктыны басьтӥськыса, зэмзэ но тросэзлы выльысь дышетсконо луиз. Артистъёсын нимысьтыз ужазы кырӟанъя дышетӥсь Валерий Каракулов, эктонъя дышетӥсь Полина Лебедева. Геройёслы дӥськут кылдон бордын ужаз тодмо модельер Олег Ажгихин. Нош пуктӥсь суредась интые ӧтизы архитекторез Касим Галихановез.
«Малы басьтӥм архитекторез суредась интые — мыным кулэ вал дунне шоры архитектор сямен учкон. Тани та декорация — со милям шудон корка но, со ик милям таверна но, со ик милям пӧртэм-пӧртэм эшшо мар но луоз, созэ уг вера», — пусйиз Алексей Ложкин.
Спектакльлэн кутсконаз Ассольлы 12 арес тырме. Кызьы вераз солэсь рользэ шудӥсь Наталия Буранова, зарни шорзэ шедьтыны уггес на быгаты, героиняез я солэсь пичигес пӧрме, я бадӟымгес. Мюзикл борды басьтӥськыны но кышгкытгес вал, шуэ.

«Кышкыт, малы ке шуоно ми таӵе кырӟанъёс ӧм на кырӟаллялэ. Кышкыт, малы ке шуоно бызьылоно, эктоно, соку ик кырӟано. Ми трос кузя. Ми ӧвӧл на ужаллямын та жанрен, но милям режиссёрмы юн басьтӥськемын, со оске малпанэзлы, соин милемлы но пыӵатэ осконзэ. <…> Но ми туж шумпотӥськомы, кыӵе ке но сюлэм кырӟаса ик лыктоно»
Ассольлэсь рользэ шудӥсь Наталия Буранова

Солэн кылъёсызъя, Ассольлэсь рользэ шудон сярысь ноку ӧз малпалля. Малпанъёсаз вал Джульетта, Анна Каренина, Наташа Ростова…
«Малпасько, туала улонлы ми возьматом сыӵе юн адямиез, кудӥз пушказ ноку но уг дугды оскемысь. Со сыӵе адямиос пӧлын улэ — лек адямиос пӧлын, кудъёсыз осконзэс ыштэмын, соин ик соос понна номыр но ӧвӧл дуноез, соослэн ӧвӧл яратонзы. Мон малпасько, Ассоль соосты жаля. Мыным потэ, учкись, кудӥз пукоз залын, мед валалоз мынам героиняе шоры учкыса - улонын вань на чылкыт малпан, со одно ик куке но быдэсмоз», — вераз егит артистка.
Пусъёмы, «Алые паруса» мюзикл Россиысь лулчеберетъя министерство юрттэмен пуктэмын. 2017 году йӧскалык театр «Культура России» нимысьтыз федерал программая грант утӥз.
Спектакльлэн премьераез 28-тӥ но 29-тӥ куартолэзьлы чакламын.

ВАТСАН
Яратон, паймымонэзлы оскон сярысь «Алые паруса» кузьвероссэ Александр Грин (нялтас вераса со вордскемын Вятской губерниын) гожтӥз 1916–1922 аръёсы. Мюзикллы крезьгур гожтӥз тодмо крезьгурчи Максим Дунаевский, кылбур но либретто Михаил Бартенев но Андрей Усачёв. Нырысьсэ сое пуктӥзы 2010-тӥ арын Москваын (РАМТ).

Майя Бывальцева
ИА «Удмуртия»
26.06.2017