Школаез мон йылпумъяй 1968-тӥ арын, но ортчем дыр уг люкеты ӵош дышетскем эшъёсыным юн кусып возьыны. Ӵем гинэ пумиськылӥськом: кинлэн ке вордӥськем нуналаз яке мукет шумпотонэз дыръя, ӝож мугъёсын но адскылоно луэ. Пӧртэм интыосын но пӧртэм удысъёсын тыршо ӵош будэм эшъёсы. Вань соос пӧлын депутатэз но дипломатэз, конструкторез но артистэз, дышетӥсез но бухгалтерез… Зэм но, турлы сямъёс, пӧртэм улон сюресъёс… Сыӵе ик пӧртэм сюресъёс вылтӥ мынӥллям Удмурт театрлэн «Улон — шудон» спектакльысьтыз геройёс но. Соос огазе люкаськиллям — эшсылэсь 40 арес тырмонзэ пусйыны. Тодмо писательлэн, драматурглэн, «Литературная газеталэн» валтӥсь редакторезлэн Юрий Поляковлэн «Одноклассники» (удмурт кылын «Улон — шудон») пьесаяз огшоры учыр сярысь гинэ вераськон мынэ кадь. Соин ӵош ик отысь яркыт адӟыны луэ туала обществомылэсь умой но вӧсь луон интыоссэ. Городысь огшоры квартира, укно сьӧрын адске черклэн вылтусыз… Татын куноосты витё, мӧйы кышномурт егитэныз ӵош ӝӧк выл дасяло. Огез бӧрсьы мукетыз куноос но вуыны кутскизы ни, вордӥськем нуналзэ пусйись муртсы гинэ уг адӟиськы. Тани сое но инвалид коляскаен поттӥзы эшъёсыз пӧлы. Иван Костромитин (арт. М. Васильев) афган ожын сӧсырмыны сюремын, со уг быгаты вераськыны но, ветлыны но, котырысь улонэз но чик уг адӟы, уг вала. Со понна улон 20 ар талэсь азьло дугдэмын. Но эшъёсыз сое ярато, гажало, котькудӥзлэн сямен ик улоназ ас вакытаз со шӧдскымон пытьы кельтӥз. Светлана Погожева (артистка О. Гаврилова) школаын «витьёслы» гинэ дышетскем, табере дышетӥсь, егит дыръяз юн синмаськемын вылэм Ванялы. Нылзэ будэтэ, улэ сюлмызлы кельшисьтэм картэныз. Но соиз но чиптэм-чаптэм пегӟем — кыӵе ке банклэсь ссуда басьтэм, коньдонзэ тус-тас карем, табере кышноез но нылыз пыдйылчи кыльыны быгатозы, пунэм тыронзы понна соослэсь квартиразэс таланы малпало… Артистка Оксана Гаврилова оскымон но сюлме пыӵамон образ кылдытыны тыршем. Но спектакльлэн куд-ог сценаосаз уггес тырмы актрисалэн быгатонлыкез, учкись пумозяз солы уг оскы. Чылкак мукет улон сюресэз кылбурчилэн Фёдор Строчковлэн (артист К. Галиханов). Вина юыны яратэменыз, со улон интытэк кылемын, кылбуръёсыз но кылбуръёслы уг кельшо ни. Улонлэн пӧртэм тубатъёсаз сылӥсь муртъёсты одӥг азе люкам драматург Юрий Поляков. Татын ик баӵко но (артист В. Мадзеков), кунгож сьӧры ӟеч улон утчаны кошкем журналист но (артист В. Краснопёров), егит дыръяз чеберайёслэн конкурсазы вормисе потылэм но татчыозь чебер яратонэз витись Анна Фаликова но (артистка В. Моисеева). Но ваньзы соос витё олигархез но городлы мэре кандидатэз Виктор Черметовез (артист И. Моисеев). Ваньзы уло малпанэн: солэн зӧк кисыысьтыз, оло, пичи ке но коньдон мыным но сюроз? Черметов Костромитинэн Афганистанын ӵош ожмаськемын, нош табере соос пӧртэм полюсъёсын, кыкназы но эшъёссэс бордазы кыско ке но. Спектаклез пуктӥсь режиссёр Алексей Ложкин геройёс пӧлысь нокудзэ но нимысьтыз уг висъя, соос ваньзы татын валтӥсесь луо. Котькудӥз аслэсьтыз пуш сюлэмзэ кисьтэ номыре кылӥсьтэм но валасьтэм Иванлы: тодо уго, со нокинлы номыр уз вера. Режиссёрлэн ӵапак та сценаосыз тужгес но удалтэмын кадь потӥз мыным. Мизансценаос но пӧртэм сямен пуктэмын, тыл но пӧртэм сямен югдытэ геройёсты. Улон сюресэз нокинлэн но вольыт ӧвӧл, дыр. Котькуд адямилэн аслаз адӟонэз. Асьме обществомылэсь вӧсь луись яраоссэ сцена вылэ поттыса, драматург но, соин ӵош театрысь артистъёс но учкисьёсты малпаськыны косо кадь: шонер-а асьмеос улӥськомы, сю пӧртэм сюресъёс пӧлы ӧм йыроме меда? Удмурт театрын котьку сямен ёрмылӥзы профессиональной режиссёръёслы. Артист Алексей Ложкин та удысэ сюлмысьтыз кыстӥське, «Улон — шудон» солэн нырысетӥ постановкаез ӧвӧл. Мукет режиссёръёсын ӵош ужаз ни А. Чеховлэн водевильёсыз, В. Садовниковлэн «Сюан» комедиез бордын. Но режиссёрлэн ужез нимысьтыз дышетскемез кулэ каре. Сюлэмыз кыстӥське бере режиссура борды, А. Ложкинлы дышетсконо та ужлы пыр-поч. Леонид Гусев, Удмуртиысь культура удысысь дано ужась газ. «Удмурт Дунне», 13 декабря 2011г.