Удмурт Республикаысь национальной театрын Юрий Поляковлэн пьесаезъя алигес возьматэм «Улон — шудон» кык ёзэн драма монэ нырысетӥ секундъёсысеныз ик бордаз кыскиз адскисьтэм гозыен. Артистъёс быгатыса шудэменызы пукон бордам ик кортӵогазы кадь. Секыт ожъёс пыр ортчыса, кулон но улон вискы кискачен кадь пачкатэм, гадязы орденъёсын но медальёсын пиос, вордскем палъёсазы бертыса, шуге-леке шедё чиновникъёслэн но котырысьтызы адямиослэн кӧс сюлэмо луэменызы. Таӵе югдур шоры сюлмаськытэк, вожпотытэк учкыны уг луы. Мон ачим спектакльын шудыны кутски кадь, пушказ ик пыри, нош номырзэ воштэме уг луы… Одӥг классын дышетскемъёсты улон пӧртэм сэрегъёсы пазям, вамышъёсты дунъяны пӧртэм сямен дышетэм, синъёссэс мальдытӥсь дэраосын кыскем. Кинэ ма сюлмаськытэ! Соос понна зэмлык мудор луэ чал-чал улӥсь, котыр улослэсь но калык улонлэсь кудпала бергамзэ сюлмыныз валась Иван Костромитин. Шумпотон-а, куректон-а бордазы лякиське, ӵош дышетскем эшъёсыз со азьын мудорлы кадь усьтӥсько, вань сюлэм висёнзэс но малпанъёссэс шараяло. Егит режиссёр Алексей Ложкин пьесаез юнме шорысь бырйымтэ. Та уженыз со, пукыӵен но, пыӵалэн но ыбытэк, «10» лыдпусэ йӧттэ. Спектакльын ӝутэм учыръёс туж лэчытэсь, соос йылаз-пумаз вуттэмез кулэ каро. Улонын но ӵемысь луэ военкоматын сямен ик. Отын ужась кык пол вуылэ сӧсырмем Иван Костромитинэз вордскем нуналэныз ӟечкыланы, кык полаз но умойтэм кузьым вае (я киызлы, я пыдызлы протез, нош Иванлэн пыдыз но, киыз но вань). Майор, йырзэ урдыса, пыре, нош умойтэм учыре сюремзэ уг но вала, валаны но уг тыршы кадь. Таӵе учыръёс улонын туж ӵем пумиськыло, куд-ог адямиослы улон аспӧртэмлыко шудонлы пӧрме, кытын котьку но вормисе потэ кужмоез. Таяз учыре котькинэ вормиз сӧсырмемез бере чал-чал луэм Иван Костромитин. Солэн коньдонэз но ӧвӧл, тазалыкез но, улон сюресэз но кырыж-мерыж кошкиз кадь, но со кужмо, со вӧзын вань яратон но зэмлык. Иван эшъёсызлэн пельпум сьӧразы ватскыса ӧз улы, ожын вань шуг-секытъёсты вормиз, кулонэз но кужмо киосыныз кекатӥз. Котыраз тросгес мед луысалзы вылэм валась сюлэмъёс. Инмарлы тау, солэн вӧзаз вань Светлана нимо яратӥсь эшез но анаез, кудӥз котькуд секундэ но минутэ, котькыӵе дыре пиез вӧзын, сое вала но юрттэ. Юрий Поляков ӟуч писатель ке но, солэн произведениысьтыз геройёс Удмурт шаерысь басьтэмын кадь, соос лач-лач удмурт кылын верасько, удмурт сямъёссы шараясько. Таиз ини потэ берыктӥсьлэн Анатолий Григорьевлэн но режиссёрлэн Алексей Ложкинлэн ог-огзэс валаса ужамзы бордысь. Малпанъёссэс артистъёс пыр усьтыны быгатӥллям соос. Спектакльлэн пуштросэз мыным туж матын. Журналистлэн сюресэз трос пол вуттылӥз ни куректонэн ӵоксузем огшоры удмурт семьяосы, кытын анаез но пиез огназы выро та дунне вылысь зэмлыкез утчаны, берпум кужымзэс поттыса, улонлэн нюжаез борды кырмисько, «юрттэлэ!» шуыса кесясько. Но малы ке соосты кылӥсьёс ӧвӧл… Алексей Ложкин, «Улон — шудон» драмаез пуктыса, нырысь ик чиновникъёслэн зӧк корт ӧсъёсазы йыгаськыны тырше кадь, соос вӧзамы улӥсь шуге-леке вуэм адямиосты медаз вунэтэ шуыса. Учкисьёслы вера кадь: куректонэз вормыны луэ, ӵош кариськыса гинэ. Георгий Грязев, Удмурт Элькунысь дано журналист газ. «Удмурт Дунне», 13 декабря 2011 г.