Государственный национальный театр Удмуртcкой Республики

  «Чупчи крезь» спектакль пумысен малпанъёс  

«Зарни понна ӧй лыкты мон!»

«Чупчи крезь» спектакль пумысен малпанъёс

Удмурт театрлэн сцена вылаз выль сямен пуктэмын П. Захаровлэн «Эбга» трагедиез — «Чупчи крезь» спектакль.
П. Захаровлэн трагедиез «Эбга» нимын Удмурт театрлэн сцена вылаз пуктэмын вал ни 1993-тӥ арын. Спектакль борды соку басьтӥськиз режиссёр Василий Ушаков. Та спектаклен ик Удмурт театр нырысьсэ потаз кунгож сьӧры — дуннеысь фин-угор театръёс куспын Финляндиын радъяськем вожвылъяськонэ. Соку та спектакльлэн ӵапак дырыз вал: фин-угор дуннеын кузёяськыны кутскиз этнофутуризм.
Таяз радэ со бордын ужаны секытгес вал, вылды: этнофутуризм лябӟиз, туала учкисьлы «этно» интые возьматы жугиськонъёсты, вакчи но ӵем вошъяськись суредъёсты. Таиз пумысен шӧдске: малпаськиллям шудӥсьёс но, режиссёр но — Алексей Ложкин, суредась но — Валентин Белых. Кызьы вера режиссёр, тужгес секытэз — со пьесалэн автореныз огкылэ вуон. П. Захаров текстэз борды берытскылэм на — пьесалэн пумыз лэчытомытэмын, монологъёсыз волятэмын.
Катанчи усьтӥськем бере ик син азьын вошъяськыны кутскизы Валентин Белыхлэн суредъёсыз, пель сьӧрын чузъяськиз ву жильыртэм куара. Удмурт театрлэсь берпуметӥ премьеразэ — «Мултан ужез» — учкем бере сюлме кышкан каръяськиз вал: туала амалъёсын декорациосты кылдытон (проектор пыр сцена вылэ суред уськытон) нош ик валтӥсь интые потэ? Кышкан юнме вылэм — «Чупчи крезь» спектакльлэсь туссэ лэсьтон бордын пыр-поч ужамын. Кыӵе декорациос — пулэсь Тӧро пукон, тӧдьы басмаосын кыскем Чупчи шур! Кыӵе костюмъёс — куос, ыргон весьёс но ошетъёс!
Спектакльын троссэ валтӥсь рольёсты шудӥзы егит артистъёс: Зуй — Вадим Дмитриев, Дукъя — Мария Дмитриева. Донды вал Удмуртиысь калык артист Геннадий Бекманов. Шудӥзы зол. Сцена вылын палашъёсын жугиськемзы шоры учкыса, тодмо режиссёрлэн Константин Станиславскийлэн «Уг оскиськы!» кылъёсыз йырам ӧз чилекъялэ. «Театре синкылиосты учкыны уг лыкто, вуо сюлме пырись веранъёсты кылыны», — вераз француз драматург Дени Дидро. Та кылъёсты тодэ вайытэ Эбга (Наталия Буранова). Дондыкаре со вуэ востэм ныл дыръяз, нош пьеса пумын луэ зэмлык понна нюръяськись, дӥсьтӥсь эксэй кышномурт.
«Чупчи крезь» учкисьёсты нуэ вашкала удмуртъёслэн улоназы, куке Ватка палъёсын кивалтӥз Донды, куке калмезъёсты валтӥз Эбгалэн выжыез. Донды пӧртэм музъемъёсысь вузчиосын кусып во-зиз, Ваткаез утизы кужмо воргоронъёс. Но улон вӧй вылтӥ кадь ӧз ортчылы! Калмезъёс лябесь вал. Соос, тушмонъёсын ожмаськем интые, нюлэсъёсы пегазы. Соин сэрен тушмонъёс ӵем омырскылӥзы Ватка музъем вылэ но. Огазеяно калмез но ватка калыкъёсты, малпаз Донды. Кызьы? Зуй пиезлы калмез Эбгаез кышно ваёно! Но Эбгаен ӵош Дондыкаре трос воштӥськонъёс вуо. «Эбга — со жугиськон», — вера Вӧсясь.
Спектакльын трос пӧртэм ваче вуонъёс. Кылсярысь, Донды но Зуй куспын. Атай уг вала пизэ, пиез санэ уг басьты атаезлэсь малпанзэ. Донды Зуез ас интыяз кельтыны турттэ. Нош Зуйлы кулэ ӧвӧл ожъёс, Тӧро пукон, солэн потэ калыклэсь сям-йылолъёссэ бичамез-эскеремез, кырӟанъёсты дауръёслы кельтэмез. Та муген ик атаен пиен керето, Зуй атаез бордысь кошке.
Кыкетӥез ваче вуон — Эбга но Дукъя. Дукъя Дондылэн кыкетӥ кышноез луэ. «Кыкетӥ кышно — кышно ӧвӧл ни», — сипырто Дондылы. Дондылэн синмыз выль кен вылэ усьылыны кутске. Кусыпъёс эшшо но лэчытомо Донды Дукъялэсь уксётӥрлыксэ Эбгалы кузьмам бере.
— Тазьы тон пересьлэсь вань зарнизэ кыскод, — йырыз курен вера Дукъя.
— Зарни понна ӧй лыкты мон! — пумитаз вазе Эбга.
Нош мар понна? Эбга вала: зэмлык понна!
Мукетыз ваче вуон лушкем ортче. Огпалаз сыло Донды но Зуй, мукет палаз — Ӧрӟи. Ӧрӟи кивалтэ армиен. Но та солы ӧжыт. Ӧрӟилы кулэ Тӧро пукон. Вожомем мылкыдзэ эшшо но бугыртэ ултӥям Дукъя. Ӧрӟиен Дукъя быдто Зуез. Донды, яратоно пизэ ыштыса, шузиме но Чупчи шурлэн ӧраз кошке. Ватка палъёслэн улонзы кыле Эбга кие. Но мар быгатоз лэсьтыны огназ кышномурт? Та вие со уг быгаты пумитъяськыны сьӧд кужымъёслы. Ватка инбамез вотсало сьӧд пилемъёс.
Но умоезлы оскон кыле на — будэ Дондылэн но Эбгалэн Чибинь пизы.

Мария Векшина
"Удмурт Дунне"
2016-тü ар 27-тü куартолэзь