Борис Бегишев но Настя Грачёва ог-огзэс ярато. Пияш кык арнялы кошке, ӵыжы-выжыосызлы туганэзлэсь нимзэ гинэ шарая - Настя. Борислэн песянай-песятаез кема малпаськыса уг уло, асьсэос кен курало. Озьы коркаязы вуэ Настя Сорокина.
Тодмо нимъёс но тодмо учыр. Соку ик син азе пуксе удмурт драматурглэн Игнатий Гавриловлэн «Жингрес сüзьыл» пьесаез. Ӵапак та спектаклез Удмурт театр учкыны ӧте 4-тü но 5-тü толсуре. Удмурт классикаез выль сямен пуктэ театрлэн валтüсь режиссёрез Алексей Ложкин.
Нырысьсьэ «Жингрес сüзьыл» Удмурт драмтеатрлэн репертуараз кылдüз 1964-тü арын, сое пуктüз режиссёр Геннадий Веретенников. 1988-тü арын пьеса нош ик сцена вылэ берытскиз, та рад режиссёр вал Леонид Романов. Табере пьеса борды басьтüськиз Алексей Ложкин. Кароно-а спектаклез туала яке азьвыл манерен ик пуктоно? Режиссёр бырйиз кыкетüзэ.
- Котькуд адямилэн улоназ вань сыӵе вакытъёс, кытчы солэн берытскемез потэ, кытын ваньмыз ӟеч, капчи, - вера Алексей Ложкин. – Выль спектакль уз луы авангард шӧмо, татын уз чцзъяськы пелез вандüсь крезьгур, калык уз адӟы спецэффект шуонъёсты но. Валтüсь интые пото адями кусыпъёс но мылкыдъёс. Со вакытэз умойгес усьтон понна чузъяськозы тодмо но сюлэмлы матын луэм гуръёс. Артистъёс быдэстозы Николай Шкляев крезьгурчилэсь чебересь кырӟанъёссэ. Кин ке, спектаклез учкыса, ортчем аръёсаз берытскоз, нош кин ке со ортчем вакытэз аслыз нырысьсэ усьтоз.
Настя Грачёвалэсь рользэ шудüсь актриса Марина Самсонова верамъя, спектакль тунсыко потоз егит калыклы.
- Спектакль сыӵе шуныт мылкыд кельтэ. Азьло аръёсы егитъёс ваньмызлы дыр шедьто вылэм: ужаны, шулдыръяськыны, супыльтыны. Гочано соослэн яратонзылы но. Туала вакытэ егитъёс гожтüсько но, кык толэзь улыса, люкисько ини яке чик кузпалъяськытэк уло. Нош та спектакль возьматэ: валтüсь интыын – семья, - шуэ Марина Самсонова.
М.Самсонова, валтüсь ролез шудэм сяна, художник-постановщик но луэ. Пусйыны кулэ, выль «Жингрес сüзьылын» кык состав артистъёс ужало. Кылсярысь, Борис Бегешевлэсь рользэ шудо Сергей Наговицын но Константин Никитин, Паримонлэсь – Геннадий Бекманов но Петр Романов, Тимофеевналэсь – Екатерина Яковлева но Елена Сунцова. Котькуд артист ролез пушкы быдэсак сылме. «Жингрес сüзьыл» котькуд учкисьлы ӟеч но капчи мылкыд кузьмалоз, чебересь малпанъёссэ яке тодэ ваёнъёссэ сайкатоз.
Наталия Панфилова
«Удмурт дунне»
2015-тü ар 27-тü шуркынмон
