Вуж драма - выль синмын

Удмурт театрлэн 85-тӥ сезонэз усьтӥськоз «Мултан уж» спектаклен.Со сӥземын Удмуртилэн кунлык басьтэмез дырысен 95 ар тырмонлы но удмурт классиклы М. Петровлы 110 ар тырмонлы.
Писательлэн М. Петровлэн «Вуж Мултан» романэз сярысь нокинлы но веранэз ӧвӧл, дыр. Мадьяр тодосчи Петер Домокош романэз ӵошатӥз удмурт калыклэн энциклопедиеныз. Удмурт театр «Мултан уж» борды нырысьсэ уг басьтӥськы ини, туэ со куатетӥез постановка луоз. Нырысьсэ М. Петровлэн пьесаезъя «Зӥбет зурка» нимын спектакль пуктэмын вал 1936-тӥ арын (режиссёрез Г. Брауэр). 1939-тӥ арын пьесаез «Вуж Мултан» нимын дасязы режиссёръёс К. Ложкин но А. Саратов (М. Федосимов режиссёр кивалтэм улсын). Куинетӥ премьера вал 1945-тӥ арын. Соку спектакль вуылӥз Нижний Новгородын ортчем национальной театръёслэн смотразы. 1950-тӥ аръёслэн кутсконазы М. Петров пьесазэ выльдэ. Учкись доры со вуиз 1959-тӥ арын, М. Петров улонысь кошкем бере. Сое пуктӥз егит режиссёр М. Покчи-Петров. Витетӥзэ Удмурт театр берытске та постановка борды 1976-тӥ арын. «Вуж Мултан» романъя дасям спектаклез пуктӥз режиссёр Александр Блинов. Туэ, 40 ар пала ортчыса, А. Блинов нош ик басьтӥськиз та произведение борды.
Выль спектакльын 50 геройёс, соин ик куд-ог артистъёс кӧня ке рольёсты шудозы. Режиссёр Александр Блинов Удмурт театрысь вань артистъёслэсь луонлыкъёссэс ӟеч уг тоды вал бере, «Мултан уж» борды кутскон азяз ӵем вуылӥз дорамы, учкылӥз постановкаосты. Туннэ нуналлы артистъёс но режиссёр валче туж тунсыко ужало. Котькуд рольысь, сценаысь ӵош шедьтыны тыршо зарни эсэпсэ, чаклало, кенешо, кызьы луоз устогес, чебергес. Александр Блинов верамъя, бадӟым произведениез сцена вылэ поттон — огдыре тунсыко но туж секыт уж.
— Вылез постановка — со мукет жанр, — вера Александр Андреевич. — Азьвылэз тупа вал детективлы, нош таяз учкись адӟоз калык драмаез. 40 ар талэсь азьло мон романэз инсценировать кари, али быдэсак воштӥсько текстэз, сценалэн кылызлы матын мед луоз шуыса, лэсьтӥсько ӵыжак-выль пьеса. Выляз ужам тросгес драматургиез, трос калыкен сценаос уно. Кылдӥзы выль сценаос, выль геройёс, суд но татын музон сямен мыноз. Но пуштросэз но хронологиез тӥямын уз луэ. Малы берытски та тема борды? Мольер ас вакытаз шуиз вал: «Театр — со кафедра, кытысен верано шугъяськытӥсь ужпумъёс сярысь». Соин ик мон выльысь басьтӥськи Мултан уж борды, малы ке шуоно калык пӧлын улэ нацизмлэн через, со туж кышкыт. Асьмеос, Украина шоры учкыса, адӟиськом, маин со берытскыны быгатэ. Та спектакльлэн валтӥсь ужпумез: историын луэм учыр вылын возьматыны, макем кышкыт луэ мукет выжыысь калыкез ултӥян. Пьеса кулэ бадӟымъёслы но, егитъёслы но, пеймыт яке югыт мед луоз калыкмылэн ортчем сюресэз, адямиос тодыны кулэ историзэс. Шӧдыны но дунъяны калыкъёслэсь эшъяськонзэс. Та спектакль — кышкыт Мултан уж сярысь верась одӥг шапык гинэ, но со асьмелы маде калыкъёслэн кусыпъёссы, пӧртэм выжыысь адямиослэн секыт югдуре валче кариськыны быгатэмзы сярысь.
Режиссёр верамъя, спектакль мыноз кык кылын. Удмурт геройёс вераськозы удмурт сямен, ӟучъёсыз — ӟуч сямен. Со озьы ик луыны кулэ, котькуд калык ас кылыныз вераське ук. Валантэм луысал, удмуртъёсты утись В. Короленко но А. Кони спектакльын удмурт сямен вераськысалзы ке.

Наталия Панфилова,
Удмурт театрысь литература ёзэн кивалтӥсь
"Удмурт дунне", Сентябрь 25, 2015
http://udmdunne.ru/2015/09/udmurt-teatrlehn-85-t-sezonehz-ustskoz-multan-uzh-spektaklen/