Государственный национальный театр Удмуртcкой Республики

  Тугаськем бугор. Мар вормоз: мылкыд яке визь?  

Быдӟым Вормонлэн 70 ар тырмонэзлы сӥзьыса, Удмурт театр выль спектакль пуктӥз: «Саня, Ваня но…». Дасямын со Россиысь тодмо драматурглэн, сценаристлэн, режиссёрлэн Владимир Гуркинлэн «Саня, Ваня, с ними Римас» пьесаезъя.
Сценарист В. Гуркин калыклы тужгес тодмо «Любовь и голуби», «Кадриль» кинофильмъёсъя. Гуртын улӥсь огшоры адямиослэсь семья кусыпъёссэс со возьматэ синвуэн суро капчи серекъян пыр. Гуркинлэн таиз пьесаез берпуметӥез, секыт висьыса, 2010-тӥ арын со улонысь кошкиз. Та ужезъя Россиысь пӧртэм театръёсын спектакльёс пуктэмын, 2009-тӥ арын потӥз «Добрые люди» фильм.
В. Гуркинлэн таиз но ужез гуртоос сярысь, таяз но яратон кусыпъёс колӟояськемын. Пьесаын возьматэмын пыдлось гуртын улӥсь 3 сузэр-апайёслэн семьяоссы.
Таослэн улонзы пыр адӟытэмын вань калыклэн драмаез. Сталин кивалтон вакытэ юнме шорысь янгыше уськытон, война, пленэ шедён, гуртысь нылкышноослэн ож вакытэ секыт адӟонзы, отын ик яратон но вожан. Ваньмыз со погыльтӥське 3 сузэръёслэн семьяоссы вылтӥ. Адӟон огзэс но уг жаля.
Спектакль учкисьёсты вуттэ война кутсконлэн нырысетӥ нуналъёсаз. Сузэръёс кышкытлыкез валаса ӧз вуттэ на, оско, кӧня ке арня куспын фашистъёс пазьгемын луозы. Бадӟымез апайзы, Нюрка (шудэ А. Лазарева), 5-тӥ нылпи вайыны дасяське. Со сярысь нокин уг тоды на, нош Соня сузэрзылэн (Р. Николаева) туливить сямо нылыз кӧто луэмзэ шӧдэм-валам ни. Та пумысен Женя (М. Самсонова) паймыса вера киросанаезлы, Санялы (В. Моисеева). Нош таизлэн сузэрзылэн, Санялэн, пинал ваемез уг луы. сузэръёс ог-огенызы тупаса уло, картъёсынызы но кусыпъёссы умоесь. Нюркалэн пал пыд кылем кузпалыз пумысен пичильтык кер-нор потэ ке но, сузэръёслэн картъёссы, Иванэн Петыр, югдурез ӝог волято. Серекъян, шузияськон, мунчое пырон — война но кытӥ ке палэнэтӥ ортче кадь пыдлось нюлэскын улӥсь семьяос понна. Нош сьӧд кырныж вадьсазы поръя ни вылэм.
Колхоз ваньбурез изъянто шуыса, Санялэн но Сонялэн картъёссы вылэ НКВД-е урттылӥське сельсоветлэн тӧроез — городысь вуэм маке, ачиз колхоз улонэз уг ик вала. Иванэз (Г. Бекманов) но Петырез (В. Мадзеков) пытсэт сьӧры нуыны лыктэмъёс сярысь семьяоссылы лушкемен ивортэ милиционер Римас (С. Пислегов), Литваысь тапалъёсы улыны кылем воргорон. Пытсэт сьӧры сюронтэм понна бусёнъёс фронтэ пегӟо. Война бере 4 ар ортчыса гинэ, ивортэк ышем-бырем Ваня дораз бертэ, Саня кышноез ӵапак со нуналэ Римасэн сюан шудыны малпало. Кызьы сэрттӥськоз-пертчиськоз тугаськем бугор: нылкышнолэн та дырозь кысымтэ яратон мылкыдыз вормоз яке семьязэс война вакытэ быронлэсь утем Римасэз быръёз?

* * *

Война сярысь драмаез учкыса, малпай вал, одно синвуасько. Но нырысетӥ суредъёс сюлэмез ӧз позыртэ, гольтресгес йӧтӥз сцена вылын шузияськон-маскаръяськон. Маскаръяськонэз ке верано, мон понна комедия — одӥгез яратоно жанр. Серекъяны но, бӧрӟытыны но турттонъёс постановкаын вань, но спектаклез учкыса, кыӵе ке но валантэм мылкыд кылдӥз: кӧттырымон ӧй серекъя, синвуосы ӧз пызьыралэ. Шуысал, спектакль яраз но, ӧз но.

* * *

Синъёсты но мылкыдэз шунтӥз сцена вылысь вож гуждор — небыт вож турын вылэ выдэм ик потэ (сое керттӥллям театрысь 8 нылкышноос). Сценаез шулдыртон ласянь сюлмаськем Пермьысь суредась Г. Аверкин. Сцена вылын ӧй вал синэз жадьытӥсь мултэс арбериос, суредъёс, вошъяськонъёс — ваньмыз огшоры. Крезьгур но юрттӥз геройёслэсь пуш мылкыдзэс усьтыны но валаны — кылын озьы уд вера. Со понна тау шуоно Анатолий Эркишевлы.
Копаськон мылкыд кыл-дӥз, спектакльысь удмурт шӧмзэ адӟымтэысь. Со удмурт учкись вылэ мертамын бере, шакшы ӟуч кылъёсты пыртоно вылымтэ — асьмелэн тышкаськон лексикамы сотэк но узыр. Пуж-пуж юыса пукон но со вакытысь удмурт нылкышноослы уг тупа — курытсэ веръялозы гинэ вал. Кин ке, оло, шуоз: ваньмыз та чыры-пыры. Но со спектаклез шӧгомытэ. Вис дыръя таӵе мылкыдъёссэс веразы учкисьёс но.
Кыкетӥ люкетэз бордаз золгес бинялтӥз ни. Но сцена пушкы выем мылкыдэз кытӥ-отӥ нош ик сӧрылӥзы вераськон пӧлы «йыромем» ӟуч тышкаськонъёс. Ярам, кырсь кылъёс ӧз чузъяське. Текстэз синхрон амалэн ӟуче берыктӥсь Елена Сунцова верамъя, соос пьесаын тырмыт вал. Валтӥсь героез, Иванэз, шудӥсь Геннадий Бекманов но шуэ, тышкаськон кылъёс асьсэлы артистъёслы но сюлмазы уг йӧто. Та пумысен ужалом на, пе. Нош оглом верано ке, пьеса ӟеч берыктэмын, кылзыны капчи. Та бордын тыршем Владимир Котков.
Спектаклез пуктӥз ӟуч режиссёр Владимир Сафонов, солы удмурт кыллэн шӧмыз валантэм, сям-йылолъёс но тодмотэмесь. Соин ик, бадӟым уж борды кутскыку, кенешыны кулэ, дыр, тодосчиосын. Та ласянь адӟем кароно эктонъя но кырӟанъя «Айкай» театрлэсь: эктон-кырӟанъёс, дӥськут — ваньмыз консультантъёсын эскеремын.
Вань та верамъёс шоры учкытэк, спектакль малпаськытӥсь, сюлэмез вырӟытӥсь, кинлэсь ке синкылиоссэ но поттоз, вылды. Автозаводын кема аръёс ӵоже ужам ӟуч нылкышно Ольга Пушина шуиз:
— Удмурт театрлэсь ваньзэ сямен спектакльёссэ учкисько — наушникен пукисько. Туж кельше артистъёслэн сюлмысь шудэмзы. Туннэ но мылкыдме бугыртӥзы.
Удмурт театрысь сыӵе бугырскем мылкыдын вань учкисьёс мед потозы.

Лия Малых
газ. «Удмурт дунне», 24 апреля 2015 г.
http://udmdunne.ru/2015/04/15130/