Государственный национальный театр Удмуртcкой Республики

  Премьера! Визь ворме мылкыдъёсты  

Кытчы вуттэ эрико яратон
Удмурт театрлэн сцена вылаз нош ик вордüськиз комедия. Таяз учыре отын кузёяськиз Нобель премилэн лауреатэзлэн, Италиысь Дарио Фолэн «Свободная пара» пьесаезъя дасям «Эрико яратон» спектакль.
Семья улон, ог-огедлэсь жадён но отысь потон сюресъёс утчан – вакчияк озьы вераны луысал пуштроссэ. Италиын тон улüськод яке дуннелэн мукет сэрегаз, яратон но вожан котькуд семьяе йыгаськыны но кусыпъёсты сӧрыны быгато. Та ласянь спектакль кыӵе ке выль ужпумез уг ӝуты. Вераськон мынэ семья шоры мукет синмын учкон, дышем сямъёсты тüян сярысь. Та пьеса гожтэмын кылем даурысь 70-тü аръёсы, Италин соку семья улон шоры сӧриськем очки пыр учкисьёс трос луизы. Малпасько, та ласянь Удмурт театрлэн выль ужез ӵапак интыяз. Кунгож сьӧрысь культура асьме доры но вӧлме, нош семья улон шоры учконъёс Западысь куд-ог кунъёсын укыр эрикоесь.
Дарио Фо аслэсьтыз геройёссэ инженерз Мамберттиез но солэсь кузпалзэ Антонияез возьматэ, гротеск, фарс, сатира амалъёсты кутыса. Семьялэсь трагедизэ комедилы пӧрмытыса, уката но яркыт возьматэ, кыӵе питранэ вуттыны быгатоз эрико яратон. Мар бен со сыӵе яратон?
Кема аръёс ӵош улыса, Мамбертти аслэсьтыз шудзэ утчаны кутске палэнысь, Антониялы но ӵектэ валесэ мукетэныз выдыны. Но азьло сямен ик соос кылёзы, пе, одüг липет улын. Нылкышно пумит луэ таӵе кусыпъёслы, чида картэзлэсь калгемъёссэ, майбыр улонэз сярысь ушъяськемъёссэ. Чиданэз чигон калэ вуыку, Антония керетон ӝутэ, ассэ быдтонэн кышкатъя. Валамон, таӵе югдур Мамберттилы но, быдэ вуэм Роберто пизылы но уг кельшы. Бератаз Роберто анайзэ дышетэ ассэ ачиз кияз кутыны, выльысь синмаськымон но яратымон луыны.
Спектакльын кык валтüсь геройёс - Мамбертти (И.Моисеев) но Антония (В.Моисеева). Яратон, вожан, шузияськон сценаосты улонын но кузпал луись артистъёслы капчи, дыр, вал шудыны. Огшокчемен учкиськод соослэсь мурт семья улонэ быдэсак сямен выемзэс. Бӧрдыны кулэ кадь, нош соослэн выросъёссы, вераськемзы шоры учкыса, гориськод. Нырысетü люкетаз Антония огвыллемгес адӟиськиз, тросгес кесяськиз, керӟегъяськиз ке, кыкетü люкетаз пӧртэм ымнырзэ возьматüз ни: огдыре ик лек, ненег но кескич. Эрико яратонлэсь, собере ини кышнозэ ыштонлэсь поромем Мамберттилэн ролез уката но яркытгес адӟиськиз.
Геройёслэсь кусыпъёссэс усьтыны, сценаосты яркыт но чебер карыны юрттüзы эктонъёс. Удмурт театрлэн сцена вылысьтыз крезьгуро спектакльёсты адӟылэм вал, но таиз кыӵе ке мукет улонысь басьтэмын кадь. Егит артистъёслэн крезьгур шудэм улсын бергамзы, эктэмзы сюлэмез ик бугрытэ. Ресторанысь егит пилэн но ныллэн ӟырдыт эктэмзы озьы ик малпан пыӵатэ: визь вормоз мылкыдъёсты, та семьяын но ваньмыз умой луоз.
Учкисьёслы ӟеч мылкыд кузьмамзы понна тау карыны кулэ спектакль бордын ваньмызлы ик ужасьёслы. Тунсыко сценография, чебересь эктонъёс, крезьгур… Но нырысь ик пусйыны кулэ режиссёрез Алексей Ложкинэз. Та спектакль бере со сайказ Удмурт театрлэн валтüсь режиссёрез луыса.
Дарио Фолэсь пьесазэ удмурт сцена вылын возьматон мылкыдыз А.Ложкинлэн азьлогес ик вылэм ни. Спектаклез эктонъёсын узырмытыны малпанъёссэ быдэстон понна кема гинэ утчай, пе, балетмейстерез. Синйылтэм операя но балетъя театрысь Петр Овчинниковез.
- Ужаны кутскемез бере Овчинников туж паймиз вал, нырысьсэ, пе, пумиськисько таӵе визьтэм малпанъёсын. Но спектакльысь суредъёсты адӟыса, малпан солы туж кельшиз. Азьланяз но ӵош ужалом. Театрын сомында егитъёс, соослэсь быгатонлыкъёссэс кутыны кулэ, мюзиклозь но вуом, оло. Мылкыд вань удмурт батыръёс сярысь спектакль пуктыны, - шуэ А.Ложкин.
Спектаклез учкыны жадем мылкыдын мынü вал, дорам бурдъяськыса кадь бертü. Вань ук асьмелэн но чебер театрмы, быгатüсь артистъёсмы, синмаськымон егитъёсмы. Кулэ на удмурт пьесаос.

Лия Малых
газ. «Удмурт дунне», 2014-тü ар 12-тü толсур