Москваысь Щепкин нимо театр училищеез таяз арын быдтэмъёс асьсэлэсь быгатонлыкъёссэс возьмато. Куинь диплом ужъёссы пӧлысь шаерысьтымы учкисьёслы кузьмалозы кыксэ.
Д. Фонвизинлэсь «Ослоп» («Недоросль») пьесазэ удмурт кылэ берыктӥз А. Григорьев. Та пьеса пыре школаын дышетоно программае. Артистъёс син азямы пуктозы дас тямысэтӥ даурез. Вашкала вакытэз оскымон карыны юрттозы быгатыса дасям костюмъёс. Удмурт шӧмо карон понна комедия суралтэмын калык сям-йылолъёсын, со даурысь дӥськутъёсын ӵош луозы удмурт дэремъёс, эктон-кырӟанъёс. Та амал пичи но уг тӥя спектакльлэсь пуштроссэ. Быгатыса берыктэм пьеса учкисьлы матын но валамон луоз лэчыт кылъёсын, серемес веранъёсын.
Егит артистъёслы творческой сюрессэс кутскыны та пьеса тужгес но тупамон. Классикаез шудыны секыт ке но, со актёръёслэсь быгатонлыкъёссэс, мастерствозэс будэтыны юрттоз. Пуктӥсь режиссёр-педагог Д. Кознов но егит артистъёс авторлэсь малпанъёссэ усьтон понна яркытэсь образъёс кылдыто, геройёссылэсь мылкыдъёссэс быгатыса усьто.
Диплом спектакль Москваысь сцена вылын вылӥ дунъет басьтӥз. Нош асьмеос премьераез дунъяны быгатом 21-тӥ инвожое.
У. Шекспирлэн «Гужем уе вӧтан» («Сон в шалую ночь») пьесаезъя пуктэм спектакль котырын мае ке выльзэ возьман мылкыд – интрига – кылдӥз. Элькунысьтымы Ӟуч театрын кунгож сьӧрысь тодмо классиклэн та пьесаезъя спектакль дасяз ни вал палэнысь ӧтем режиссёр И. Сакаев. Со туж авангардной пӧрмем. Соин ик учкисьёслэн ӵошатэмзы потэ ни Удмурт театрын пӧраменыз. Тазэ спектаклез пуктӥз режиссёр-педагог Л. Новикова. Пьесаез удмурт кылэ берыктӥз П. Захаров.
Действие мынэ Грецилэн шоркараз Афиныын но со вӧзысь нюлэскын. Афинылэн эксэез Тезей дасяське сюанлы, амазонкаослэсь эксэй кышнозэс Ипполитаез кузпал вайыны. Сюанэз уйшоре ортчытыны чакламын. Мар отысь пӧрме – учкись ачиз адӟоз но дунъялоз ни.
Спектакль декорациосын но, костюмъёсын но яркыт пӧрмемын, эктон-кырӟанъёсын узырмытэмын, нюръяськон-жугиськон номеръёс пыртылэмын. Егит артистъёс таяз но спектакльын персонажъёссылэсь лулпуш дуннезэс шараяны быгато, геройёссылэн мылкыдзылы тупась выросъёс но интонациос шедьто. Учкисьёсты оскытыны быгато – дунне вылын валтэ яратон.
Таиз спектакль Удмурт театрлэн сцена вылаз мыноз 26-тӥ инвожое. Оскем потэ, егит актёръёслэн синмаськымон шудэмзы, режиссёръёслэн ужъёссы учкисьёс понна зэмос праздниклы пӧрмозы.

Наталия Панфилова
газ.»Удмурт дунне» 21.06.2013