Удмуртиысь Йӧскалык театр Степан Широбоковлэн «Ой, чебер нылъёс» пьесаезъя выль ужзэ возьматыны дась. 20-тӥ куартолэзе валтӥсь, йылпумъясь, репетицизы ортчиз: артистъёс спектаклез декорациос пушкын но костюмъёсын кутсконысеныз пумозяз шудӥзы. Озьы ик журналистъёслы спектакль бордын ужамзы сярысь веразы.

Агроном Гирой Матвеич котыр ласянь синмаськымон: йӧно, чебер, ужась, быгатэ усто вераськыны но аслыз синмаськытыны, но одӥг гинэ шекез вань – чебер нылэз адӟе ке, соку ик синмаське. Анаезлэн сюлворемезъя, егит адями кышнояськыны кылзэ сётэ. Егит но чебер бухгалтерез Соняез, яратӥсько но гажасько шуыса, кышнолы кура. Епифановна, Гиройлэн анаез, шумпотэмын: пиез табере «визьмаськиз» но солы кен ваёз, нылаш солы туж кельше. Быръемын ини сюан нунал, вань ӵыжы-выжыоссы солы дасясько, но тупаны но кулэ ук, соослэн гуртазы витьымтэ шорысь выль ужась вуэ – чебер но синмаськымон нылаш Тоня…

Кык ёзэн крезьгуро комедилэн пуктӥсь режиссёрез – театрысь егит актёр Константин Ложкин. Бадӟым сцена вылын удмурт спектаклез со нырысьсэ дасяз.

Со луоз стилизация, воксё туала ӧвӧл. Авторлэсь ми ваньзэ кельтӥм: автор гожтӥз яратон сярысь, нош яратон со азьло но, али но со яратон, со ноку но уз быры. Туалагес лэсьтӥм ми сое, но зол ӧм вошъялэ номыр но, авторлэн кылъёсыз ваньмыз кылемын
Константин Ложкин, «Ой, чебер нылъёс» спектаклез пуктӥсь режиссёр

Вадим Дмитриев спектакльын агрономез Гирой Матвеичез шудэ. Солэн верамезъя, героез аспӧртэмлыко, туж задор воргорон, но «пичи гинэ висёнэз вань: туж яратэ нылъёсты». Егит актёр оске, ролез яркыт но вунонтэм луоз шуыса.

Вераны кулэ, Константин Ложкин но, Вадим Дмитриев но азьвыл пуктэм спектакльёсты юри учкиллямтэ. Соос пьесаез асьсэ сямен усьто, ас валамзыя кылдытэм образъёсты возьмато.

Мон азьвыл постановкаосты ӧй учкы, <…> малы ке шуоно собере отысь марзэ ке асэстэм кадь луоз. Соин ик мон аслым йырам кылдытӥ кыӵе образ, со образэз ик туртто сцена вылэ поттыны, возьматыны, кыӵе мынам пӧрмиз шуыса
Вадим Дмитриев, Гирой Матвеичлэсь рользэ шудӥсь

Спектакльлэн адӟиськисьтэм «героез» - Николай Шкляевлэн та спектакльлы гожтэм крезьгурез. Театрысь крезьгуръя ӧнерчи Антон Васильев верамъя, таяз радэ со но мукетгес чузъяськоз.

Азьло тенденция вал (крезьгурез – ред.) электроннойгес карыны, нош ми туэ каримы именно кызьы Николай Егорович баянэн сое шудэ вал - под народный оркестр-а, мар-а шуом. Тани Костя со (спектакль – ред.) более современной шуыса вераз, но со дыре кельтӥмы музыкальной оформленизэ азьло аръёслэсь
Антон Васильев, «Ой, чебер нылъёс» спектакльлы крезьгур бырйись

Азьвыл ваньмыз кырӟанъёс гожтэмын ке вал, таяз спектакльын троссэ кырӟанъёсты артистъёс «улэпкын» быдэстозы. Антон Васильевлэн верамезъя, 90-тӥ аръёсы студиын гожтӥськон «модно» вал. Али улэп крезьгур вылӥ дунъяське. Оглом крезьгур геройлэсь пуш дуннезэ усьтыны юрттэ, куддыръя нырысь-валысь адӟиськисьтэмзэ но.

Крезьгур шонер быръемын ке, со пушсэ геройлэсь усьтэ. Куддыръя, кылсярысь, герой луэ ке но отрицательной, нош кырӟанъя возьматэ, солэн усьтӥське мукет палыз, пушказ ваньмыз урод вӧл шуыса. Пӧртэм кырӟан аслэсьтыз мукет функцизэ нуэ на: чеберлык понна чебер кыӵе ке вставка медам лу со шуыса. Тани спектакль, пе, тунсыко ӧвӧл, ойдолэ, пе, кырӟан отчы пуктом но тунсыко луоз. Николай Егорычлэн со вставкаос ӧвӧл, а именно кыӵе ке но мылкыдэз, малпанэз азинтон, веранэз азинтон. Соос (геройёс – ред.) кырӟаны вуо пушкынызы – уг быгато кырӟатэк. Кырӟан соослы юрттэ пушсэс капчиятыны яке эшшо мар ке
Антон Васильев, «Ой, чебер нылъёс» спектакльлы крезьгур бырйись

Спектакльлы костюмъёс театрысь актриса Марина Самсонова кылдытӥз. Соос котькуд дырлы тупамон шуыны луоз. Одӥг ласянь, бездытгес буёлъёс ортчемзэ, дэремъёслэсь «кема улэмзэс» возьмато кадь, мукет ласянь, ӵапак сыӵе бездытгес буёлъёсын дӥсь, чилясь басмаос туала вакытэ туж вӧлмемын. Озьы ик туннэ паськыт кутӥсько йӧскалык пужыос. Ватсалом, Марина Самсонова спектакльын Сонялэсь рользэ но шудэ.

Пьеса кемалась ке но гожтэмын, спектакль туала егитъёслы но тунсыко луоз, лыдъя Вадим Дмитриев.

Режиссер Константин Ложкин тыршиз туала улонэз возьматыны сцена вылын, туала улонлэсь шӧмъёссэ, яратон шоры учконзэ. Мыным потэ пьеса азьло гожтэмын ке но, кыӵе отын проблемаос ӝутӥсько, кыӵе ужрадъёслы саклык висъяське, со туала арын но туж актуально
Вадим Дмитриев, Гирой Матвеичлэсь рользэ шудӥсь

Кызьы вераз журналистъёслы Йӧскалык театрлэн валтӥсь режиссёрез Алексей Ложкин, егитъёслэн ужазы со ӧз пыриськы. Ас вакытаз «Ой, чебер нылъёс» спектакльын Дорогойлэсь рользэ шудӥз вал, соин ик кык пӧртэм пуктэмъёсты ӵошатыны туж тунсыко луоз, шуэ со.

Сое пукто милям егит артистъёс, соослы чик но мон ӧй люкеты. Мынам малпанэ кӧня ке но пӧртэмгес соослэсь ни. <…> Артистъёс тросэз шудылэмын пӧртэм-пӧртэм рольёсты, со ми понна но туж, шуом, волнительно учкыны, кызьы таос лэсьтозы. <…> Мон малпасько, та туж сюлэмез зуркатӥсь спектакль луоз, тодэ ваёнъёс. Артистъёслы но, мон малпасько, учкисьёслы но со сюлмазы пыӵаны кулэ
Алексей Ложкин, Удмуртиысь Йӧскалык театрлэн валтӥсь режиссёрез

Пусъём, «Ой, чебер нылъёс» пьесаез театрын ньыль пол пуктылӥзы ни. Выль спектакльлэн премьераез 23-тӥ куартолэзе ортчоз. Возьматон удмурт кылын мынэ, чакламын ӟуч кылэ синхрон амалэн берыктон.

Майя Бывальцева
21.05.2019
ИА«УДМУРТИЯ»