Финн-угор калыкъёслэн театръёссылэн «Майатул» XII калыккуспо фестивалязы Удмуртиысь калык артистэз Александр Баймурзинэз «Пичи люкетысь устоез роль» («Лучшая эпизодическая роль») номинациын пусйизы. Со сярысь ивортодэтъя «Удмуртия» агентстволы вераз элькунысь Йӧскалык театрысь литературая ёзэтлэн кивалтӥсез Наталия Панфилова.

Йошкар-Олаын ортчем фестивальын удмурт театр «Насьток но Исьток» крезьгуро комедизэ возьматӥз. Отын Александр Баймурзин ёзвисёнлэсь курадӟись пенсионерлэсь Ерофей Бурдовлэсь рользэ шудэ.

Спектаклез пуктӥсь режиссёр Алексей Ложкин но, артистъёс но пусйизы, та ужмес учкисьёс туж шуныт пумитазы. Соослы туж кельшем
Наталия Панфилова, Удмуртиысь йӧскалык театрысь литературая ёзэтлэн кивалтӥсез

Тодэ вайытом, Финн-угор калыкъёслэн театръёссылэн «Майатул» XII калыккуспо фестивальзы Марий Эллэн шоркараз 14-18 шуркынмонэ ортчиз. Туэ со комедилы сӥземын вал. Йошкар-Олае Карелиысь, Комиысь, Удмуртиысь, Мордовиысь, Пермь шаерысь, Ханты-Манси округысь, Венгриысь, Эстониысь, Финляндиысь театр коллективъёс вуизы.

Ватсалом, 2016-тӥ арын фестиваль йӧскалык йылолъёслы сӥземын вал. Удмуртиысь Йӧскалык театр «Чупчи крезь» драмазэ возьматӥз, сое «Национальное наследие» номинациын пусйизы.

Майя Бывальцева
19.11.2018
ИА «Удмуртия»