Удмуртиысь Йӧскалык театр Финн-угор калыкъёслэн театръёссылэн «Майатул» XII калыккуспо фестивалязы 15-тӥ шуркынмонэ Йошкар-Олаын «Насьток но Исьток» крезьгуро комедизэ возьматоз. Ужрад Марий Эллэн шоркараз 14-18 шуркынмонэ ортчоз. Со сярысь удмурт театрлэн пресс-службаез ивортэ.

Фестивале Россиысь но кунгож сьӧрысь финн-угор калыкъёслэн валтӥсь театръёссы ӧтемын. Валтӥсь ужпумез – театр искусствоез азинтон но узырмытон вылысь финн-угор театръёслэсь кусыпъёссэс юнматон.

Таяз арын фестиваль комедилы сиземын (нимысьтыз саклык крезьгуро ӧрлы). Удмурт театрлэн репертуараз кык крезьугро комедиос – ретро амалэн пуктэм «Жингрес сӥзьыл» но экспериментальной «Насьток но Исьток».

Одӥгзэ бырйыны капчи ӧй вал. Но фестивалез радъясьёслы кыкетӥез тунсыко потӥз, соослэн верамзыя, сыӵе возьматон фестивальын ӧй вал на. Спектакль «Золотая мелодия» ансамбль улэпкын шудэм улсын мынэ, соин ик фестивале крезьгурасьёс но пыриськозы
Наталия Панфилова, Удмуртиысь йӧскалык театрысь литературая ёзэтлэн кивалтӥсез Вераны кулэ, фестиваль аспӧртэмлыко конкурс луэ, котькуд возьматонэз театр

искусство удысысь нимо-дано адямиослэсь кылдытэм жюри дунъялоз.

Ватсалом, 2016-тӥ арын фестиваль йӧскалык йылолъёслы сӥземын вал. Удмуртиысь Йӧскалык театр «Чупчи крезь» драмазэ возьматӥз, сое «Национальное наследие» номинациын пусйизы.

Тодэ вайытом, Удмуртиысь йӧскалык кун театр Марий Эл Элькунэ «Бадӟым гастрольёс» федерал ӵектос улсын но вуылӥз ни.

Майя Бывальцева
13.11.2018
ИА «Удмуртия»