Удмурт йӧскалык театрысь егит артист Максим Григорьев кема аръёс ӵоже кисьмам малпанзэ быдэстӥз — моноспектакль кылдытӥз. Трос учкисьёс азе поттэмлэсь азьвыл «1900-й. Легенда о пианисте» ужзэ ӵош ужась эшъёсызлы, ӵыжы-выжыосызлы, лулчеберетъя колледжын дышетскисьёслы но журналистъёслы возьматӥз. Нош спектакль йылпумъяськем бере юанъёслы валэктонъёс сётӥз.
Европаысь Америкае мынӥсь корабльын кельтэм лимон улысь коробкаын арлыдо матрос али вордскем пияшез шедьтэ. Пересь уг тоды на, куштэм эмигрант пинал таланто крезьгурась (музыкант) луоз шуыса, солэн данлыкез быдэс дуннее вӧлмоз, но ачиз со дунне понна ноку, но уз луы… Итальян драматурглэсь Алессандро Барикколэсь «1900-й. Легенда о пианисте» пьесазэ пуктыны юрттӥзы режиссёр Вероника Моисеева, хореограф Полина Лебедева, суредась Василя Фатихова.
Максим Григорьевлэн верамезъя, моноспектакль пуктон сярысь малпанъёсыз Удмуртиысь йӧскалык театре ужаны пыремез бере ик кылдӥзы. Сыӵе ужъёс элькунамы туж ӧжыт, со сяна, егит актёрлэн ассэ возьматэмез, мылкыдъёссэ усьтэмез потӥз. Но малпанзэ быдэстон понна произведениез шедьтыны капчи вылымтэ.
Яке мынам улон опытэ пичи ай, мон ӧй быгатысал со материалэз усьтыны, яке воксё уг валаськы вал. Со уж ялан мынӥз. Утчай, утчай но кылем арын одӥг кутскемен, выйыса кадь лыдӟи но валай — тани со, тае пуктыны кулэ
Максим Григорьев, Удмурт йӧскалык театрысь артист
Нош моноспектакль пуктыны мылкыдын «висьыны» кутскиз Евгений Гришковецлэсь «Как я съел собаку» ужзэ учкемез бере. Собере солэсь вань моноспектакльёссэ учкем, вотэсысь трос таӵе возьматонъёсын тодматскем. Нырысь ик малпам, спектаклез огназ ик дасялоз шуыса. Но соку ик театрысь мукет спектакльёсын шудыны кулэ, эшшо мукет ужъёс шедё…
Собере малпаськод, ой, мон туннэ жади, шутэтскыны кулэ. Озьы нунал бӧрсьы нунал, арняос, толэзьёс ортчизы. Малпасько, сыл ай, тазьы азинскыны уг луы, мар ке но лэсьтоно. Соку мон Вероника Владимировналы вазиськи — со мынам вераськонъя дышетӥсе. Мон малпай, со адями, кудӥз быгатоз малпанъёсме улонэ пыӵатыны. Верай, со шуиз, ойдо, утчалом
Максим Григорьев, Удмурт йӧскалык театрысь артист
Максим Григорьев верамъя, озьы ик театрысь актёръёс, костюмеръёс, ӵыжы-выжыосыз, анай-атайёсыз, бускельёсыз пичиен-пичиен юрттӥзы. Кылсярысь, декорациослы лампаосты гуртоосызлэсь курем, нош ящикъёсты варматаез лэсьтэм.
Моноспктакль бордын ужаны кутскизы южтолэзе. Инвожолы нырысетӥ ёззэ дасязы но йӧскалык театрысь артистъёслы возьматӥзы, соос умой дунъязы но ужез азьланьтыны куризы. Гудырикошконысен котькуд нунал сямен репетициос ортчытъязы ни.
Монопьесаын, валтӥсь верасез сяна, эшшо 25 адями. Тросэз соос одӥг-кык кыл яке предложение гинэ верало ке но, сое но шудыны кулэ. Эшшо трос крезьгур — джаз — чузъяське, дырлэсь ортчемзэ возьматэ кадь степ.
Та спектаклёзь, ну, джаз ке джаз. Нош пьесаез лыдӟем берам мон джазэн висьыны кутски. Мынам джаз котькытын вал — телефонын, машинаын. Со вакытъёсысь, 20-тӥ-30-тӥ аръёсысь, композициосты кылзӥськи, джазлэн кылдэмез сярысь фильм учки. Мыным со туж кельшиз. Джаз али мынам сюлмам
Максим Григорьев, Удмурт йӧскалык театрысь артист
Спектакльын Максимлэн валтӥсь ролез — трубаен шудӥсь. Артистлэн ужъюлтошъёсыз али гинэ тодӥзы, та крезьгуро арбери солы тодмо вылэм шуыса.
«Мон трубаен шудӥсько. Армиын служба нуыкум оркестре шеди, отын трубаен шуыны дышетски. Армия бере шудыны ӧз кылдылы ни, но туж потэ, мынам турбае мед луоз шуыса», — вераз Максим Григорьев.
Степ Максимлэн улоназ йӧскалык театрын пуктэм «Алые паруса» мюзиклэн вуиз. Но та эктонэз дышетыны мылкыдыз азьвылгес ик вал ни. Соин ик мюзикллы эктонъёсты пуктӥсь Полина Лебедеваез моноспектакль бордын но ужаны ӧтиз.
Спектакль 1 час 40 минут мынэ. Вань со дыр ӵоже артист учкисьёс азьын огназ: нокытчы уд ватӥськы, нокин уз юртты. Пичи залын ӧвӧл ӝужыт сценаез, артист но учкисьёс ог огзылэсь шокамзэс кыло, котькуд син воштэмзэс адӟо. Но ӵапак со верано учырез мургес валаны, сое зэмлыко возьматыны юрттэ, лыдъя Максим Григорьев.
Татын тон улӥськод. Вот татын тон кутскиськод улыны. Со ик вань, ку тон аслэсьтыд малпанъёстэ, кудӥз бугыръяло тынэсьтыд сюлэмдэ, пыӵало, тон соосты поттӥськод, вераськод и кызьы ке но озьы луэ, что пумаз, ӟуч кылын вераса, сыӵе кайф, удовлетворение
Максим Григорьев, Удмурт йӧскалык театрысь артист
Вылӥ устолыко кргезьгурасьлэн — Дэнни Будман Т. Д. Лемон 1900-й (итальян кылын — Новечентолэн) — улон сюресэныз тодматскыны но Максим Григорьевлэсь сыӵе ик вылӥ устолыко шудэмзэ адӟыны луоз 13-тӥ, 14-тӥ но 15-тӥ куарусёнэ Удмуртиысь йӧскалык театрлэн пичи залаз.
Спектакль ӟуч кылын мынэ. Чаклам арлыд: 12+
Майя Бывальцева
10.09.2018
ИА «Удмуртия»
