Удмурт йӧскалык театрлэсь талисманзэ кылдытонъя вожвылъяськон ялӥзы Удмуртиын. Со сярысь ужъюртлэн «ВКонтакте» вотэсбамаз ивортэмын.
Кызьы шуэмын ивортонын, талисманлы валтӥсь курон — со Удмурт театрез, солэсь творчествоя лулзэ, аспӧртэмлыксэ возьматыны кулэ. Малпам образ одно ик яркыт, тодэ кыльымон но капчи мылкыд сётӥсь мед луоз. Ӵектэм талисман удмурт (финн-угор) лулчеберетлэсь аспӧртэмлыкъёссэ огазеяны но пӧртэм арлыдъем, йӧслыкен но ӧнерен адямиослы валамон луыны кулэ
Удмурт йӧскалык театрлэн пресс-службаез

Пусъемын, талисман нимысьтыз конкурслы шуыса малпамын мед луоз. Суредъёс одно ик пыриськисьёсын кылдытэмын луыны кулэ, Интернетысь ужъёсты кутыны уг яра. Вожвылъяськонэ вань мылкыд карисьёс пыриськыны быгато — нимаз но, коллективен но. Автор ачиз быръе, кыӵе луоз талисманэз — пӧйшур, анимированной лулос, театрен герӟаськем персонаж яке арбери. Суредан амалэз пыриськись озьы ик аслаз мылкыдызъя быръе. Талисманлы автор вакчияк валэктон но ним сётыны кулэ.

Уж котькыӵе амалэн лэсьтэмын луыны быгатэ, коть буёло, коть сьӧдо-тӧдьыё. Одно ик малпанлэсь пуштроссэ гожтоно, быръем образлы валэктон келяно. Эн вунэтэ талисманлы ним сётыны (умой луоз удмурт яке мукет финн-угор кылъёсын, ӟуч кылэ берыктонэн)
Удмурт йӧскалык театрлэн пресс-службаез

Устоез талисман театрлэн рекламаяз но синпельёсаз кутӥськоз, нош сое малпасьлы 2018-2019 аръёсы ортчись спектакльёсы абонемент сётозы. Тужгес усто ужъёсты кылдытӥсьёс дипломъёс но кузьымъёс басьтозы.
Вожвылъяськон 1-тӥ коньывуонозь кыстӥськоз.
Ужъёсты nacteatr@yandex.ruэлектрон адресъя ыстоно.

Наталья Тетерина
16.07.2018
ИА «Удмуртия»