Россиысь Лулчебертъя министерстволэн но Гастроль ужъёсты радъянъя федерал центрлэн «Бадӟым гастрольёс» программазы улсын улосъёсысь театръёслэн луонлыксы кылдӥз «борддоръёссэс» паськытатыны.

Озьы туэ Удмурт театрын аслэсьтыз постановкаоссэ возьмтӥз ни вал Марий Элысь театр. Нош кылем арняе шаерысьтымы учкисьёсты шумпоттӥзы Комиысь музыкально-драматической театрысь артистъёс. Ижевске соос вайылӥзы 3 спектакль: нылпиослы «Ксюша да инопланетянин» выжыкыл, «Женись, сынок, женись» комедия но «Жизнь с привилегиями «навечно» документальной драма. Режиссёрзы – Светлана Горчакова.

Берлояз вуылыса, быдэс пуш берытскиз кадь. Аслаз немец выжыосызлэн адӟонзы сярысь пьеса гожтэм Николай Волохов. Кноблихъёс гань-гань уло-выло вал Одессаын, зарезь дурын. Но ваньзэ сура-пожа война. Совето Союзын тупаса улӥсь, сьӧлыктэм немецъёс пыртэмын вал фашистъёс радэ. Соосты уйпала тэль поттонэ ысто. Озьы 1944-тӥ арын Коми шаере вуо Кноблихъёс но. Соосты тэль шоры куштыса кельто, шуыны луоз – Кноблихъёс асьсэлы асьсэос землянка гудо. Трос шугадӟонъёс пыр потоно луизы соос, трос ӵыжы-выжыоссэс ыштӥзы, но ог-огзылы юрттыса улыны быгатэмзы луонлык сётӥз выжылы улэп кыльыны. Война бырем бере трос аръёс ортчизы, семья быгатэ дор палъёсаз берытскыны, но табере выжы лэземын ни выль интые: Кноблихъёс пыраклы кылё кезьыт, но та вакытъёс ӵоже матын луэм коми музъем вылэ улыны, угось татын вордско выль пушъетъёссы…

Автор та кайгуэз ачиз пыр поттэмын шуыса, туж шӧдӥське: спектакльысь суредъёсты артистъёс уг шудо – отын уло кадь. Мизансценаос сокем ӵем ӧй ке вошъяськысалзы, артистъёс кырзасалзы ке фонограмматэк, со вакытысь асьме немецъёслэн улэм-вылэмзы син азе уката оскымон пуксьысал. Но оглом постановка асьме учкисьёслы туж кельшиз – артистъёсты сцена вылысь кематэк ӧз лэзе.
Табере черод удмурт артистъёслы комиосты паймытыны – 18-тӥ-19-тӥ куартолэзе соос гастроле мыно Сыктывкаре. Коми театрын возьматэмын луозы «Эрико яратон» комедия, «Капитанская дочка» драма но «Царевна-Лягушка» выжыкыл.

Зинаида Кириллова
газ. «Удмурт дунне» («Удмуртский мир»)
2018-тӥ ар 19-тӥ оштолэзь

*(театрлэн ватсамез-тупатэмез - Марий Элысь театр аслэсьтыз постановкаоссэ возьматӥз кылем, 2017-тӥ, арын)