Анатолий Григорьевлэн «Намер» пьесаезъя спектаклез учкыса, ваче пумит малпанъёс, актёръёсты жалян мылкыд кылдэ.
Пьесалэн сюжетэз огшоры: Намер гуртэ пуксе НЛО. Со васькытэ та гуртын улэм гордармеецэз Лякопез. Граждан ож дыръя Лякоп сӧсырме но ивортэк ыше. Та учыр дорозь Лякоп вуылӥз вордскем гуртаз, татын солэн яратоно нылмуртэз — Аннаез — вал. Озьы ке но егит воргорон ӧз вутты кышнояськыны, нош Аннокез солэсь пи вайиз — озьыен, выжыез азьланьтӥськиз. Вуиз 2019-тӥ ар. Лякоплэн дусымез весь вите на яратонзэ. Ачиз Лякоп — туж егит, ожмаськон мылкыдыз пуксьымтэ.
Шуак улӟем гордармеецлэн синъёсыныз туала улон шоры учке драматург. Выльдӥськонъёс — дораз, семьяяз, гуртаз, странаяз. Драматург юнме таӵе амалэз ӧз куты — тазьы со учкисьёслы валамонгес но сюлэм пыртӥзы поттымонгес возьматыны тыршиз аслэсьтыз туала улон пумысен сюлмаськонъёссэ. А. Григорьев, пьесаезъя чаклано ке, капчиен вӧсь луись адями, государствоын ортчись учыръёс шоры со киыныз гинэ уг шонты. Вань быгатонлыкеныз драматург вуттыны турттэ учкисьлы аслэсьтыз мылкыдзэ. Кунлэн нимыныз ужась адямиос медаз лэсьтэ бӧрысь тупатыны луонтэм янгышъёсты, мед сакгес учкозы адямиос шоры, медаз мултэс луы Намер гурт. Мар сярысь гожтэмын пьеса — валамон, нош мае возьматэ постановка? Озьы бере, ма муген спектакль лябгес луэм ачиз пьеса сярысь?
Зэмлык понна чаклано К. Станиславский режиссёрлэсь куронзэ: «Спектакль пуктэмлэсь азьло пыр-поч чаклалэ авторез. Валаны тырше, мар со вераны турттэ аслаз произведениеныз, озьыен, шедьтэлэ валтӥсь ужпумзэ (сверхзадачазэ), темазэ, жанрзэ. Таин соглаш луиды ке, соку гинэ «нуллэм» но «вордэм» пьесаез пуктыны кутскелэ».
Спектакль сярысь верамлэсь азьло ӵошатэме потэ режиссёрлэсь но хирурглэсь ужзэс. Тани хирурглы вандоно пациентлэсь пыктоссэ. Туж чакласькыса ужано хирурглы, таза ёзвиоссэ медаз йӧтты шуыса. Сыӵе ик режиссёрлэн но малпанэз луыны кулэ. Нош «Намер» спектакльын ваньмыз мыдлань.
Дымбыр-йыг гудыръяса, сцена тыр ӵын вӧлдыса, сцена сьӧрын пуксе НЛО. Быдэс дуннеын чакласа уло та лобась объектъёсты — уго НЛО, чик аляктытэк, ӵын поттытэк, кыӵе ке инсьӧрысь ӝоглыкен лоба. Быдэс дуннеысь учёнойёс тодыны выро, мар кужымез вань солэн. Нош Удмурт театр «паймытэ»: НЛО лоба дизель эстӥськонэн. Кызьы талы уд долка?
* * *
А. Попов, К. Станиславскийлэн дышетскисез, «Целостный образ спектакля» книгаяз ӵектэ режиссёрлы: «Спектакльлэн вань люкетъёсыз: актёръёс, суредъёс, кыл, буёл, крезьгур, мизансценаос, темпоритмъёс — ваньмыз ужаны кулэ валтӥсь малпанэз усьтон понна».
Озьыен, ойдолэ чаклалом, кызьы та ужпум быдэстэмын «Намерын». Лякоп аслэсьтыз вордскем юртсэ тодаз вае: шыкыс кадь вал, пе. Мае адӟиськом сцена вылысь — отын корка ӧвӧл! Катанчи усьтӥське но — татӥ сильтӧл ортчем, лэся. Сценалэн кыкетӥ планаз йырин уллань сямен писпу пуктэмын. Вайёс интые, выжыосыз урдскылэмын. Солы вамен юнматэмын шори пилем кор.
Озьыен, режиссёр соглаш ӧвӧл драматурген, чаклаз солэсь малпанзэ ӟечгес карыны, воштыны. Пӧрмиз-а? Учкисьлы син шораз йӧтэ тяп-ляп быдэстэм уж.
Сценалэн бур палаз (учкись синмын чакласа) пуктэмын черсон станок — озьыен, татын кузё кышнолэн интыез, соку асьмеос адӟыны кулэ актрисалэсь черсыны быгатэмзэ.
Воксё валантэм эшшо таиз: актёръёслэн ветлон сюрес вылазы пуктэмын бугро — таиз, пе, колодча. Та инты сцена вылын ньӧмыз понна луны кулэ ӧвӧл, со котырын кыӵе ке «ой-ёй-ёй» выллем учыр тупаны кулэ.
А. П. Чехов шуылӥз: «Нырысетӥ актын ошем пыӵал спектакльлэн пумаз ыбыны кулэ». Жаляса верано, постановка пумын колодча «ой-ёй-ёй» ӧз лэсьты, черсон сирота сямен сылӥз. Озьы сценаез чебертонэ-тырмытонэ кутэм одӥг арбери но спектакльлэсь валтӥсь малпанэз усьтыны ӧз юртты. Иське, малы соос пуктэмын? Шоразы учкыны?
Пьесаын шыкыс кадь юртэз (зэм, аръёс ӵоже со вужмемын ни) кивалтӥсьёс туртто сэрттыны, нош улӥсьёссэ бускель Сутэргуртэ выжтыны. Озьы пырыен-пырыен автор турттэ учыръёсын радзэ возьыны, нош режиссёр куашкатэ драматурглэсь малпанзэ. Малы? Чиновник но милиционер авторлэн малпанэзъя кулэ учкисьлэсь вожзэ потыны, уго соос туртто адямилэсь юртсэ куашкатыны. Нош татын мукет луыса кошке. Малпаськод: мар та кузё (Яша) сюръёсыныз пыкиськись така кадь, юртсэ возьыны уг быгаты, силё-сюрно пӧлын улэ, эшшо пумитъяськыны выре на!
Постановщикъёс азьлань мыно. Косо Яшаез (шудэ П. Романов) кусоез молотэн йыганы. Оло, туннэ озьы яра, нош азьло вакытъёсы кусоез, пиялаез сямен, кыдатылӥзы, сое нимысьтыз легированной кортлэсь лэсьтылӥзы, соин кусоез утьыса, ӟустариен бинялтыса, возьылӥзы.
* * *
К. Станиславский гожъяз: «Рольёсты шонер люкылон бордысь потэ, пӧрмоз-а спектакль». Таин уд споръяськы. Ваньмыз-а ӟеч таяз удысын но? Ӵошатон вылысь вераме потэ. Кӧня ӟеч актёръёс турттӥзы шудыны Георгий Жуков маршаллэсь рользэ! М. Ульянов сяна, огез но оскымон ӧз шуды. Ваньмы адӟимы «Ворошиловский стрелок» фильмез. Со актёр ик — Ульянов — оскымон быдэстэ полководецлэсь но, пенсионерлэсь но рользэс. Кызьы со луэ? Но та — зэм. Нош «Намерын», жаляса верано, ӟеч актёръёс рольёссэс пыртӥзы уг потто — шудо гинэ. Кинлэн куронэзъя озьы? Театрлы валамонгес, дыр. Нош юрттэ-а со пьесалэсь вылӥ задачазэ усьтыны — пумит каре ук.
Режиссёрлэн азьлапал учкыны быгатэмез бордысь ик потэ рольёсты шонер люкылон но. Шуом, «Ворошиловский стрелок» фильмын М. Ульянов интые шудысал Е. Леонов — сыӵе ик зол, оло эшшо быгатӥсьгес актёр. Быгатысал-а фильмлэн режиссёрез С. Говорухин тазьы ик зол пуктыны фильмез? Пӧрмысал-а фильм Ульяновтэк? Нош асьме спектакльын ваньмыз мыдлань луэм. Быгатӥсь удмурт актёр В. Краснопёров шудэ Лякопез. Удмуртия понна В. Краснопёров луэ Москваын яратоно А. Миронов кадь ик. Театрлы удалтӥз сыӵе яркыт, капчи, водевильёсын шудыны тупась актёрен. Нош макем Краснопёровлэн сямызъя луэ гордармеецлэн ролез? Со бызьылэ сцена кузя, тылпуэз кысыны дыртӥсь мурт кадь. Та роль актёрлы уг тупа, со кинлэн ке мукетызлэн.
Калык артистка В. Садаева кылъёссэ укыр кыскыса, сопал дуннеысь кылӥськись куараен кадь вера. Учкись шӧдэ, макем секыт та йӧтэ актрисалы. Пьесаын Анналы 125 арес, соин драматург шонер лэсьтӥз вал, сое пукон вылэ интыяса. Нош спектакльын актрисалы диалоге пыриськон понна кытысь ке катанчи мышкысь потоно луэ, собере нош ик кошконо. Мыным потэ, В. Садаева туж секыт учыре шедемын, уката валантэм — малы озьы луэмын.
Тунсыко малпанэз драматурглэн но писательлэн Егор Загребинлэн: «Галина Владыкинаез но Екатерина Яковлеваез нокин уз «тӥялты».
Озьыен, асьмеды кык актрисаос гинэ быгато паймытыны. Котьма ке но, соос быдэс спектаклез уг кылдыто — рольёссы уго пичи гинэ. Оглом сыӵе малпан кылдэ: актёръёслэн коллективзы тырше спектаклез улӟытыны, ӟечомытыны. Озьы ик тау кароно драматурглы умой пьесаез понна. Нош кытын театрлэн валтћсь режиссёрез?
Йылпумъяса, лулӟоно гинэ: Удмурт театрын нош ик быдэсмиз ньӧмыз понна пуктэм, лултэм спектакль.
Юрий Намеров
Удмурт Дунне Май 24, 2013
