Государственный национальный театр Удмуртcкой Республики

  Удмурт театр: Удалтӥз-а «Сардан» комедия?  

29-тӥ южтолэзе, Удмурт театрын премьера — возьматӥзы А. Григорьевлэсь «Сардан» комедизэ. Учкисьёс выёзы серекъяны но серекъятыны быгатӥсь геройёслэн улоназы.

Штангуртысь Лодӥга Семон (В. Мадзеков) тымет возе. Воргоронлэн семьяез но ужез котырын ик берга быдэс гуртлэн улонэз. Семонлэн тыметаз, дун тырытэк, чорыганы уг яра, но прокуратураын ужась Василий Еремеев (К. Исаков) та куронэз тӥя но шӧдыса ик уг вутты, кызьы машина питранъёссэ пасяло но фараоссэ пильыло. Воргорон йыртэмасьёсты утчаны кутске. Нош Семонлэн пиез Славик (С. Наговицын) воксё мукет улонын берга. Со — арганчи, ансамбленыз дасяське Брангурт фестивале мыныны. Пьесаын улонлэсь 3-тӥ палзэ возьматэ Педор (В. Краснопёров) — Семонлэн атаез. Бадӟым арлыдаз со азьвыл яратонзэ Оринаез (Е. Яковлева) кышно вайыны турттэ.

Комедилэн нырысетӥ суредысеныз ик тодманы луэ Анатолий Григорьевлэсь манерзэ: сцена вылын пӧзе гурт улон, возьматӥсько пӧртэм сямо адямиос, соослэн кусыпъёссы, юмоке усьылонъёссы. Пьеса жанрезъя комедия ке но, автор серекъян пыр турттэ возьматыны туала улонлэсь пӧськыоссэ. Кылсярысь, Педорлэсь но Ориналэсь пенсиоссэ басьто пиоссы. Педор кема гинэ уксёзэ берен курыны выре — уго кышнояськемез азьын Варзи-Ятчиын тазалыксэ юнматоно. Оглом вераса, Лодӥга Семон доры ваньзы кураськыны ветло. Администрацилэн кивалтӥсез но Екатерина Петровна (Н. Тур) вуэ, Брангуртэ мыныны бензинлы уксё кулэ, пе, студентъёс Мичурин (В. Осипов) но Сократ (А. Котков) уждунзэс куро.

— Али быдэс дуннеез учконо ке, ваньмыз шузиослэн юртсылы кельше, — вера комедилэн авторез А. Григорьев. — Мар дауртӥське али улонын — синву пыр учкытэк уг луы. Мон огшоры удмурт гуртын одӥг семья вылын возьматыны турттӥ гурт улонэз. Комедия пыр. Урод улон медаз курадӟыты учкисез.

Вань геройёс пӧлысь тужгес шудоосыз — Педор но Орина. Адямиос пересьмо ке но, мылкыдзы егит кыле, соослэн яратэмзы но, кырӟамзы но потэ, шуэ А. Григорьев.

— Роле секытэн сётӥськиз, куараеным но шудыса олокызьы утчай, выросъёсме но тупатъяй. Но выремея пумен дыши, — вера пересь Педорез шудӥсь В. Краснопёров. — Мон турттӥ возьматыны мыло-кыдо пересез, со кырӟаны но, яратыны но быгатэ ай. Малпасько, куд-ог учкисьёс асьсэзыз но героеным ӵошатыны кутскозы.

Геройёс Штангуртсэс Сардан (Можга ёросысь Сарданын интыяськемын психо-неврологической диспансер) нималляло, ма, Лодӥга Семонлэн но кушем нимыз — Сардан. Уго Семон 25 ар талэсь азьло шузи кыльылӥз, али но, мунчо йылысь усьыса, йырыз сураськылӥз. Но «Сардан» нимлэсь пуштроссэ пьеса быдэсак усьтыны ӧз быгаты. Уно вал мултэс кыскем сценаос, 3 пумо сюжетной линиос — Брангуртэ мыныны дасяськон, Василий Еремеевлэн йыртэмасьёсты утчамез, Педорлэн но Ориналэн кусыпъёссы — ог-огенызы пумозяз ӧз герӟаське но учкисьёсты одӥг валтӥсь бадӟым малпанозь ӧз вуттэ. Кылдӥз юан: пьеса серекъян понна гинэ пуктэмын вал?

Но учкисьёслэн та пумысен мукет малпанзы.

— Удмурт театре мон комедия учкыны ветлӥсько. Комедия пыр татын удмурт улонлэн шӧмыз шӧдӥське, — малпа Ижысь Раиса Савельева. — Туж кельше, кызьы чебермамын сцена. Тани кыӵе кескич сямен тыметсы но лэсьтэмын, артистъёслэн дӥсьёссы тунсыкоесь.

— Юри ял карон понна театре лыктоно ке, адӟем потэ таӵе капчи спектакльёсты, — вера Дэри ёросысь Пероггуртысь Валентина Беспалова. — Трагедия милемлы кулэ ӧвӧл, куке но азьвыл адӟылӥмы ни сыӵе секыт спектакльёсты — ӧз кельшы. Удмурт театре та пумысен малпанмес но гожтыса кельтӥмы вал. Ми татчы шутэтскыны лыктӥськомы ук, секытэз асьме улонамы но тырме.

Мария Векшина
газ."Удмурт дунне"
Апрель 4, 2018