Удмурт йӧскалык театр учкисьёсты выль уженыз тодматыны дась. Театрысь валтӥсь режиссёр Алексей Ложкин тодмо удмурт драматурглэн Анатолий Григорьевлэн пьесаезъя кык ёзэн «Сардан» комедия пуктӥз.
«Сардан» — со одӥгезлэн валтӥсь геройлэн кушемнимыз но йырвизь висёнъёсын адямиослы юрттэт сётон эмъюрт (интыяськмезъя, Сардан станция, нарицательной ним луэмын — шузиослэн юртсы)
Вань веран одӥг гуртысь одӥг семья котырын берга — Штангуртын улӥсь Ладыгинъёслэн (Лодӥгаослэн) улоназы возьматэ шорысь но серемес учыръёс кылдыло, но кытӥ-отӥ со серекъян пыр секыт улон вужерак адӟиське кадь.
Штангуртысь Лодӥга Семон асьсэ гурты ник тымет возе. Солэн Славик пиез клубын ужа, нош атаез, Педор, бускельзэ кышно басьтыны малпа, но солэсь азьвыл ёзвиоссэ санаторийын юнматэмез потэ…
Пьесаезлэсь пушлыксэ журналистъёслы усьтӥз драматург Анатолий Григорьев.
"Али быдэс дуннеез учконо ке, ваньмыз со шузиослэн юртсылы кельше. Тани англичанъёс мар даурто, Сириын мар даурто. Со синву пыр сыӵе улон луэмын. Кудӥз серекъя, кинлы со туж бадӟым бӧрдон вае. Мон огшоры удмурт гуртын одӥг семья вылын возьматыны турттӥ, кыӵе луэмын улон"
Анатолий Григорьев, драматург
Тужгес яркытэз роль — 80 арессэ ортчем Педор. Сое вошъяськыса шудозы Удмуртиысь дано артист Вячеслав Краснопёров но Удмуртиысь калык артист Геннадий Бекманов. Краснопёровлэн верамезъя, та спектакль — со асьме улонмы сярысь яркыт комедия-фарс. Капчи кадь адӟиськись героез возьматон сокем капчиен ӧз сётӥськы — «куараен но, олокызьы но утчай, озьы но, тазьы но».
"Со воргоронлэн, шӧдӥське, аслаз но улонэз капчи ӧй вал, озьы ке но со улон медаз курадӟыты учкисьёсыз. <…> Не пересез шундыны турттӥ мон, а пересез, кудӥзлэн ке кырӟаны но мылкыдыз вань, яратыны но мылкыдыз вань. Соиз борды мон кырмиськи. Нош со пыр солэн аслаз улонэз адӟиськиз — кызьы со пиналъёсын выре, кызьы со семья котыраз вераське"
Вячеслав Краснопёров, Педорлэсь рользэ шудӥсь, Удмуртиысь дано артист
«Сардан» кыӵе ке нимысьтыз вакытэн ӧвӧл герӟаськемын. Сыӵе семья, сыӵе учыръёс 20 ар талэсь азьло но, туннэ но, 20 ар ортчыса но луыны быгато. Озьы ик кыӵе ке нимаз улосэн но герӟаны уг луы — сыӵе «сарданэз» Россилэн котькуд сэрегысьтыз пумитаны луоно. Озьы ик интыен но дырен герӟамтэ декорациос но дӥськут, крезьгур (пуктӥсь суредась — Елена Корепанова, крезьгурзэ гожтӥз но бырйиз Антон Васильев).
Пьесалэн авторез верамъя, сцена вылын возьматэм суредъёс солэн малпамезъя пӧрмизы.
«Режиссёр туж умой ужаз, артистъёс мыло-кыдо тыршизы. Соин ик спектакль, малпасько, учкымон пӧрмиз. <….> Туннэ тани милям сдача шуиське, калыкез кӧня ке люкам. Учкисьёс шуныт пумитазы кадь, учком табере премьераын, озьы ик малпасько умой ортчоз», — вераз Анатолий Григорьев.
Театре шутэтскыны, серекъяны лыктэм учкисьлэн осконэз одно ик быдэсмоз. Со дыре ик аслыз кельшымонозэ пусйыны быгатоз малпаськыны, бугыръяськыны яратӥсь учкись но — спектакльлэн пушлыкез сокем ик огпӧртэм ӧвӧл кадь.
«Сардан» спектакльлэн премьераез 29-тӥ но 30-тӥ южтолэзе ортчоз.
Спектакль 12 ареслэсь бадӟым учкисьёслы чакламын.
Майя Бывальцева
ИА "Удмуртия"
