Государственный национальный театр Удмуртcкой Республики

  Удмурт йӧскалык театрын «Мёртвые души» спектаклез пуктыны суредась Санкт-Петербургысь лыктӥз  

Удмуртиысь Йӧскалык театр «Мёртвые души» спектакль дася. Пуктӥсь режиссёрез Владимир Сафонов (пуктӥз «Отцы и дети», «Ревизор», «Капитанская дочка», «Гроза» классика спектакльёсты) «гогольлэсь вселеннойзэ» кылдытыны малпа. Нимысьтыз со понна Санкт-Петербургысь тодмо суредась Игорь Шаймарданов вуиз. Со сярысь ивортӥз театрысь литературая ёзэтлэн кивалтӥсез Наталия Панфилова.
Та нуналъёсы театрысь вуриськон цехын вуоно костюмъёсты кылдытонлэн аспӧртэмлыкъёсыз сярысь кенешизы. Геройёслэн дӥськутъёссы 19-тӥ даурлэн кыкетӥ ӝыныезлы укшалозы ик, но быдэс сыӵе ик уз луэ.

Лыдэ басьтомы Гогольлэсь сатира пыр возьматонзэ. Дӥськут геройёслэн но оглом карлэн пеймыт, чеберлыкез валасьтэм луэмзэ возьматыны кулэ. <…> Дӥськут умой пуксьыны кулэ ӧвӧл, отын чик кулэтэм, серемес люкетъёс луыны быгато. Вакытэз сьӧры мынон сокем кулэ ӧвӧл, валтӥсез — образэз но концепциез утён
Игорь Шаймарданов, суредась

Та дыре со аслаз эскизъёсызъя декорацилэн макетэз бордын ужа. Сценалэн бергась люкет вылаз аспӧртэм декорация — син адӟымон кыдёке кыстӥськись павильон луоз.

Павильон — со историлэн берганэз. Дырлэн мукет палыз. Берыктӥськем камера (камера-обскура). Со камералэн «липет» вылаз — шайвыл, озьыен, лулъёс вылӥын, улӥяз «Мертвые душилэн» геройёсыз. Инъет карыса басьтэмын Шишкинлэн «Рожь» суредэз. Мынам малпамея, со Русез но, сюресэз но, пасьталаез но вань мурдалаеныз но валантэменыз туж умой возьматэ
Игорь Шаймарданов, суредась

«Мертвые души» спектакльлэн премьераез сӥзьыллы чакламын.

Майя Бывальцева
ИА "Удмуртия"
16.03.2018