Государственный национальный театр Удмуртcкой Республики

  Кылчинэз муз вылэ сапкизы  

Южтолэзе Удмурт театрын Александр Вампиловлэсь «Провинциальные анекдоты» трагикомедизэ пуктӥзы. Режиссёрез — театрысь егит артист Юрий Ерошкин, та постановка — солэн диплом ужез. Спектакльлэн «Маскара учыръёс» нимыз укыр огшоры потӥз но малпаськонэ уськытӥз вал: оло, пьесаез но — капчи гольтрес комедия гинэ?

Но «Маскара учыръёс» спектакль тросэзлэсь мылкыдзэс бугыртӥӟ кинлы ке кельшиз, мукетыз солы чылкак пумит луиз улонлэсь кырсьсэ бадӟыматыса возьматэмез понна.
Пьеса кык люкетлэсь, соослэн сюжетсы но пӧртэм, учкисьлэн сюлмаз пӧртэм мылкыд кельто. Кык учырез огазея действилэн ортчон интыез — «Тайга» кунокуалэн огшоры висъетэз. Борддорез буямын яркыт, нап-бусӥр буёлэн, нош шкафез но ӝӧкез — вуж. Кузёосыз шоголляськыны, чеберъяськыны выриллям, но куанер луэмзэс ватыны быгатӥллямтэ. Озьыен, декорациос режиссёрлэсь малпанзэ усьтыны юртто.
Нырысетӥ люкетаз, «Метранпажен учырын», совето вакытэ пичи городысь кунокуаын луэм учыр возьматӥське, адямиослэн зэмос сямъёссы усьтӥсько. Валтӥсь герой, Калошин, кунокуалэн администраторез, аслэсьтыз службазэ ӟеч нуыны тыршеменыз юмоке сюре. Озьы со аслэсьтыз ымнырзэ возьматэ: коньдон сьӧры уйиське, алдаське, кивалтӥсьёслы йыбыртъя. Гогольлэн «Ревизор» комедиез тодэ лыктэ. Дауръёс ортчо, нош адями сямъёс сыӵеесь ик кылё.
Калошин, кышкаменыз сэрен кулон калэ вуыса, сюлмысь ӧпкелемзэ возьматэ. Улонысь тӧдьызэ-сьӧдзэ со висъя вылэм, со малпаськись, аслэсьтыз улэмзэ палэнысен дунъяны быгатӥсь. Но азьпалан ассэ мукет сямен возёз меда? Шонерак валэктон сётэмын ӧвӧл, но оскон кылдэ, Калошин воштӥськоз шуыса.
«Маскара учыръёс» спектакльлэн кыкетӥ люкетэз чылкак пумит малпан кельтэ.
«Кылчинэн учыр» постановкаын кунокуалэн пиштӥсь букваосын гожтэм Taiga Hotel нимыз учкисез туала вакытэ поттэ. Валтӥсь герой, Хомутов агроном, вина юыса коньдонтэк кылем воргоронъёслы, Анчугин экспедиторлы но Угаров шофёрлы, аслэсьтыз уксёзэ кузьманы медэ. Соос паймо тодмотэм адямилэн 10 сюрс манетсэ сётыны дась луэмезлы. Ӵошатом А. Вампиловлэн пьесаезлэн текстэныз. Пьесаын геройёс малпало, Хомутовлы уксё умойтэм амалэн сюремын, соин та коньдон борды йӧтӥськыны юрдо, басьтэмзы уг поты. Саклыко совето адямиос зэмлыкез шедьтыны туртто. Нош Ю. Ерошкинлэн постановкаяз таиз учыр мукет сямен возьматэмын. Анчугин но Угаров асьсэос сьӧлыкоесь, соос оскӧ Хомутов но соос кадь ик кескич. Озьыен, уксёез капыртыны кулэ, марысь-мар ке медаз гинэ сюры со понна. Бӧрысь соос валэктон шедьтӧ Хомутовлэн анаез кулэм, солы 6 ар ӵоже пиез огпол но юрттымтэ, дораз но ветлымтэ. Нош со коньдон анаезлы дасямын вылэм.
Воргоронъёс шумпотӧ «кылчин» соос кадь ик сьӧлыко. Озьыен, та уксёен юонэз азьланьтыны луэ. Зэм ик — спектакльлэн пумаз вань геройёс бызьыса сямен ӝӧк доры мыно но юыны кутско, пӧлазы Хомутовез пырто. Кулэм муртэ буре ваён соослы юон понна муг гинэ луэ. Вампиловлэн пьесаез мукет сямен йылпумъяське: Анчугин но Угаров жаляло ӧкынӥсь (ӧпкелись) Хомутовез, соин ӵош кайгыро. Ӵош пуксьыса, Хомутовлэсь анайзэ буре вайыса, соос ӝӧк сьӧрын кырӟало.
А. Вампиловлэн пьесаез адямиез яратон, сое жалян сярысь маде, нош Удмурт театрлэн «Кылчинэн учыр» постановкаяз адямилэн ассэ гинэ яратонэз азьпал радэ пуктэмын.
Спектакль йылпумъяськем бере учкисьёс султыса ик чабизы, озьыен, та пьеса туала улонлэсь зэмлыксэ возьматэ. Туала искусство куштӥськиз ини дышетонлэсь. Со возьматэ улонлэсь учыръёссэ сыӵеен, кыӵе соос вань. Нош учкисьлы аслыз валано, дунъет сётоно.
Аслэсьтыз мылкыдъёссэ вераз Надежда Кабанова, Дэри ёросысь Шор Постол школаысь дышетӥсь:
— Зэмзэ вераса, туж кышкаса мынӥ вал спектакле. Нырысь ик, ӟуч кылысь берыктэмын шуыса. Кыкетӥез, жанрез. Комедия шуыса пусъемын ӧвӧл ке но (кык пӧртэм учырен пьеса, пе), нимыз но, афишаез но та сярысь верало. Угось берло вакытэ театрлэн сцена вылаз пуктэм комедиос огез но сюлмам ӧз лякиське. Нош таиз кельшиз! Ӟуч кылысь берыктэмын шуыса шӧдӥське ке но, пелез вандӥсь веранъёс ӧз кылӥське кадь. Пьесаез удмурт кылэ Александр Баймурзин артист берыктэм шуизы, малы ке афишаын но, программкаын но со пусъемын ӧвӧл. Маскара учыръёс малпаськыто. Тужгес но кельшиз кыкетӥ люкетэз. Туж но туж яраз С. Пислеговлэн но О. Гавриловалэн шудэмзы. Но пумзэ мукет сямен адӟем потэ вал. «Улон азьланьтӥське», — шуэ Хомутов. Нош со вакыт мукет геройёс куаш! поттыса вина юо. Тазьы-а азьланьтӥське улон? Аракылы-а быдтозы соос дас сюрсэз? Пьеса ӵоже Хомутов мукет геройёслы ваче пумит пуктэмын вал, нош пьеса пумын со ачиз но соос пӧлын сылмиз кадь. Сыӵе мынам малпанэ. Но та — спектаклез одӥг пол учкем бере малпанъёс. Сое рос-прос валан понна эшшо огпол учкыны кулэ на, дыр.

Лариса Дмитриева
Удмурт Дунне Апрель 5, 2013